سری نگر// وادیٔ کشمیر میں 21 ؍دسمبر سے شروع ہونے والی شدید سردیوں کے 40 روزہ مدت’ چلہ کلاں‘ کے اِستقبال کی تیاری کر رہی ہے اور ہینڈی کرافٹس و ہینڈ لوم ڈیپارٹمنٹ کشمیر 21 ؍دسمبر کو منائے جانے والے یوم فیرن کے موقعہ پر ’جشنِ چلہ کلاں ‘کا اہتمام کر رہا ہے جو کشمیری ثقافتی ورثے کی ایک رنگا رنگ تقریب ہوگی۔محکمہ کے ایک ترجمان نے تفصیلات فراہم کرتے ہوئے بتایا کہ یہ دو روزہ تقریب 20 اور 21؍ دسمبر کو کشمیر ہاٹ (نمائش گاہ) میں منعقد ہوگی جہاں کشمیری دستکاریوں کی نمائش کے لئے مخصوص سٹال لگائے جائیں گے۔ ان میں بالخصوص روایتی زری کڑھائی (تلّہ ورک) اور آری (ہک) کڑھائی کو نمایاں کیا جائے گا جو کشمیری دستکاری کی پہچان ہیں اور عموماً روایتی فیرن کی زینت بنتی ہیں۔ اُنہوں نے مزید کہا کہ وادی بھر سے نامور کاریگروں کو مدعو کیا گیا ہے جو لائیو مظاہرے پیش کریں گے، ہاتھ سے کڑھے ہوئے فیرن، پشمینہ شالیں اور دیگر گرم ملبوسات کی نمائش کریں گے جس سے دیکھنے والے لوگ ان ماہر ہنرمندوں سے روبرو بات چیت کر سکتے ہیں۔ترجمان نے مزید کہا کہ اِس تقریب کا مقصد سردیوں کے سخت ترین مرحلے کے دوران کشمیری روایات کو اُجاگرناہے اور فیرن کی گرمائش و نفاست کو فروغ دینا ہے جو کشمیر کا روایتی ڈھیلا ڈھالا لباس ہے اور سخت سردی میں آرام فراہم کرتا ہے۔اُنہوں نے کہا،’’یہ تقریب ’چلہ کلاں‘ اور’ فیرن ڈے‘ کی ثقافتی اہمیت کو اُجاگر کرے گی اور مقامی لوگوں، سیاحوں اور دستکاری کے شوقین افراد کو ایک جگہ جمع کرے گی تاکہ وہ کشمیر کی بھرپور فنی روایت کا مشاہدہ کر سکیں۔وزیٹروں کو ایک تہوار جیسا ماحول ملے گا جہاں زری اور آری کڑھائی سے مزین سٹالز وادی کی ہینڈلوم اور کڑھائی کی دائمی وراثت کی عکاسی کریں گے۔‘‘ اُنہوں نے لوگوںسے اپیل کی کہ وہ اِس تقریب میں شرکت کریں اور مقامی کاریگروں کی حوصلہ اَفزائی کریں۔
