جاوید احمد رانا کی مادرِ مہربان بیگم اکبر جہاں کو خراجِ عقیدت

سری نگر//وزیر برائے محکمہ جل شکتی، جنگلات و ماحولیات اور قبائلی امور جاوید احمد رانا نے آج مادرِ مہربان بیگم اکبر جہاں عبداللہ کو اُن کی 25ویں برسی کے موقعہ پر شاندار خراجِ عقیدت پیش کیا۔اُنہوںنے بیگم اکبر جہاں کو اِستقامت کی علامت اور سماجی اِنصاف کی علمبردار قرار دیتے ہوئے کہا کہ وہ جموں و کشمیر کے تمام طبقات کی فلاح و بہبود اور بااِختیاری کے لئے انتھک محنت کرتی رہیں۔وزیر موصوف نے گوجر بکر وال کمیونٹی کی ترقی اور بہبود کے لئے بیگم اکبر جہاں کی گرانقدر خدمات کا ذکر کرتے ہوئے ان کی تعلیم، صحت اور سماجی فلاح کے شعبوں میں اِنقلابی اقدامات کو سراہا جن سے اس کمیونٹی کو زبردست فائدہ پہنچا۔انہوں نے خواتین کو بااِختیار بنانے کے لئے اُن کے عزم اورلوگوں کے لئے اُن کی بے لوث خدمات کو بھی سراہا۔وزیر نے مزید کہا،’’ہم لوگوں بالخصوص گوجر بکروال کمیونٹی کی فلاح وبہبود اور بااختیار بنانے کے لئے اُن کے کام اور شروع کی گئی کوششوں کو جاری رکھنے کے لئے پُرعزم ہیں۔‘‘