بڑے پیمانے پر تباہی سے متاثرہ دھرمکنڈ کا دورہ کیا ، نقصان کا جائیزہ لیا
رام بن//ایک مختصر عرصے میں رام بن کے تیسرے دورے میں وزیر اعلیٰ عمر عبداللہ نے ضلع کے سیلاب سے متاثرہ علاقوں میں امداد اور بحالی کی کوششوں کی صورتحال اور پیش رفت کا جائیزہ لیا ۔ دھرمکنڈ علاقے میں ہوئی بھاری تباہی کا جائیزہ لینے کیلئے وزیر اعلیٰ نے علاقے کا دورہ کر کے ایک اعلیٰ سطحی اجلاس کی صدارت کی جس میں نقصانات اور بحالی کیلئے جاری کارروائیوں کا جائیزہ لیا ۔ اس موقع پر خطاب کرتے ہوئے وزیر اعلیٰ نے اس بات پر زور دیا کہ ان کا بنیادی مقصد رام بن کے لوگوں کو یہ یقین دلانا ہے کہ حکومت اس مشکل وقت کے دوران ان کے ساتھ مضبوطی سے کھڑی ہے ۔ انہوں نے اس بات کا اعادہ کیا کہ پہلگام میں المناک واقعے کے باوجود حکومت رام بن میں امدادی اور بحالی کے کام کو ترجیح دیتی ہے ۔ انہوں نے کہا کہ وہ نہیں چاہتے تھے کہ رام بن کے عوام یہ محسوس کریں کہ اب ہماری ساری توجہ صرف پہلگام پر مرکوز ہے اور رام بن کو نظر انداز کیا گیا ہے ۔ لہذا جیسے ہی سرینگر میں میرا کام کم ہوا میں فوراً ہی رام بن آیا اپنے ساتھیوں سے ملاقات کی ، انتظامیہ سے ملاقات کی اور یہاں کی صورتحال کا جائیزہ لیا ۔
وزیر اعلیٰ نے ضلعی انتظامیہ ، خاص طور پر ڈپٹی کمشنر رام بن اور ایس ایس پی کی کوششوں کی تعریف کی جس کی وجہ سے این ایچ 44 پر ٹریفک کی بحالی 24 گھنٹوں کے اندر اندر بچاؤ اور بحالی کی کارروائیوں کے بیک وقت لانچ کے ساتھ ہوئی ۔ انہوں نے قومی شاہراہ اور دیگر متاثرہ خطوں میں نمایاں بہتری کا ذکر کیا جس کے نتیجے میں ہموار گاڑیوں کی نقل و حرکت اور پھنسے ہوئے افراد اور متاثرہ آبادی کو راحت ملی ہے ۔ طویل مدتی بحالی کی اہمیت پر زور دیتے ہوئے وزیر اعلیٰ نے ضلعی انتظامیہ کو ہدایت دی کہ وہ بے گھر ہونے والے خاندانوں کو دوبارہ آباد کرنے کیلئے اراضی کی نشاندہی کریں اور ہر متاثرہ خاندان کو پانچ /پانچ مرلہ اراضی الاٹ کریں ۔ انہوں نے مزید کہا کہ حالیہ برسوں میں آب و ہوا کی تبدیلیوں کو دور کرنے کیلئے جموں و کشمیر کیلئے ڈیزاسٹر منیجمنٹ پلاننگ کی بحالی کی جائے گی ۔ عوامی نمائندوں کے ذریعہ اٹھائے گئے خدشات کے جواب میں وزیر اعلیٰ نے ڈپٹی کمشنر کو ہدایت دی کہ وہ متاثرہ علاقوں کے رہائشیوں کو تین ماہ کے مفت راشن کی فراہمی کیلئے ایک تجویز پیش کریں ۔ وزیر اعلیٰ نے عہدیداروں کو ہدایت دی کہ وہ تجارتی نقصانات کا بھی اندازہ لگائیں تا کہ انہیں ایس ڈی آر ایف کے تحت خصوصی امدادی پیکج کی فراہمی کی جا سکے ۔ انہوں نے اس بات پر زور دیا کہ حکومت متاثرہ علاقوں میں معمول کی بحالی کیلئے بچاؤ ، بازیابی ، بحالی اور دوبارہ تعمیراتی کام شروع کرنے کیلئے ایک مرحلہ وار نقطہ نظر کے ذریعے کام کر رہی ہے ۔
وزیر اعلیٰ کے ہمراہ ڈی ڈی سی چئیر پرسن ڈاکٹر شمشاد شان ، ایم ایل اے بانہال سجاد شاہین ، ایم ایل اے رام بن ارجن سنگھ راجو ، وزیر اعلیٰ کے ایڈیشنل چیف سیکرٹری دھریج گپتا ، ڈپٹی کمشنر رام بن ، ایس ایس پی رام بن ، ایس ایس پی ٹریفک این ایچ ڈبلیو اور دیگر اعلیٰ افسران بھی تھے ۔ جائیزہ اجلاس کے دوران ڈی ڈی سی چئیر پرسن ، ایم ایل ایز اور دیگر عہدیداروں نے ضروری امداد کی فوری واگذاری کا مطالبہ کیا ۔ اس سے قبل ڈپٹی کمشنر نے وزیر اعلیٰ کو صورتحال اور اقدامات کے بارے میں تفصیل سے آگاہ کیا ۔
