اقبال کالونی سونہ وار میں غیررجسٹرڈ ہوٹلوں سے ٹریفک جام
سرینگر//سرینگر کے پوش علاقے اندرہ نگر، اقبال کالونی، سونہ وار میں بغیر رجسٹریشن کے چلنے والے ہوٹلوں کی تعداد میں غیرمعمولی اضافہ اور ان کے باعث پیدا ہونے والی شدید ٹریفک بدنظمی نے مقامی مکینوں کی زندگی کو بری طرح متاثر کر دیا ہے۔ شہریوں کا کہنا ہے کہ یہ ہوٹل بغیر کسی قانونی لائسنس کے کام کر رہے ہیں، جبکہ ان سے منسلک گاڑیاں – جن میں سپلائی وین، مہمانوں کی ذاتی گاڑیاں، اور سروس گاڑیاں شامل ہیں – سڑکوں پر بلا روک ٹوک پارک کی جاتی ہیں، جس سے آمدورفت کا نظام درہم برہم ہو چکا ہے۔رہائشیوں نے الزام عائد کیا ہے کہ اقبال کالونی اور آس پاس کی گلیاں روزانہ کئی گھنٹوں تک جام رہتی ہیں۔ “یہ صرف معمولی پریشانی نہیں بلکہ ایک سنگین خطرہ ہے۔ اگر کوئی ہنگامی صورتِ حال پیدا ہو جائے تو فائر بریگیڈ یا ایمبولینس گاڑیوں کے لیے گزرنے کا کوئی راستہ باقی نہیں بچتا،” ایک مقامی شہری نے افسوس کا اظہار کرتے ہوئے کہا۔شہریوں نے بتایا کہ علاقے میں بزرگوں کی بڑی تعداد موجود ہے، جنہیں روزمرہ طبی امداد کی ضرورت ہوتی ہے، مگر سڑکوں کی بندش کے باعث انہیں بروقت ہسپتال لے جانا ممکن نہیں رہتا۔ رہائشیوں نے شکایت کی ہے کہ وہ اس مسئلے کو متعدد بار قریبی پولیس تھانہ رام منشی باغ اور بادامی باغ کنٹونمنٹ بورڈ کے سامنے اٹھا چکے ہیں، مگر اب تک کوئی خاطرخواہ اقدام دیکھنے کو نہیں ملا۔مکینوں کے مطابق، متعلقہ حکام کی غفلت اور لاپرواہی نے اس مسئلے کو مزید سنگین بنا دیا ہے۔ انہوں نے مطالبہ کیا ہے کہ انتظامیہ فوری طور پر کارروائی کرے، تمام غیرقانونی ہوٹلوں کی جانچ کر کے انہیں بند کیا جائے، اور سڑکوں پر پارکنگ کے غیرقانونی رجحان کو ختم کیا جائے۔رہائشیوں نے حکام سے اپیل کی ہے کہ وہ علاقے میں قانون کی بالادستی کو یقینی بنائیں اور ان اقدامات کے ذریعے مقامی آبادی کو درپیش مشکلات کا ازالہ کریں، تاکہ وہ ایک محفوظ اور پْرامن ماحول میں اپنی زندگی گزار سکیں۔
