حکومت نے جموںوکشمیر میں کینسر کے علاج کیلئے جدید ترین لائنر ایکسلریٹر خریدنے کا عمل شروع کیا۔ سکینہ مسعود

سری نگر//حکومت نے جموں و کشمیر میں صحت نگہداشت کے بنیادی ڈھانچے کو مضبوط بنانے کے لئے ایک اہم قدم اُٹھاتے ہوئے شیر کشمیر اِنسٹی چیوٹ آف میڈیکل سائنسز (ایس کے آئی ایم ایس) صورہ کے لئے کینسر کے علاج کے لئے جدید ترین طبی آلات لائنر ایکسلریٹر (ایل آئی این اے سی) کی خریداری کا عمل شروع کیا ہے۔لائنر ایکسلریٹر (ایل آئی این اے سی) ایک جدید آلہ ہے جس میں سی ٹی سکینر یا امیج گائیڈنس کے لئے ایک مربوط ایم آر آئی ہے جو ہائی انرجی ایکسرے اور الیکٹرون بیمز تیار کرتا ہے جبکہ آس پاس کے صحت مند ٹشوز کو نقصان کو کم سے کم کرتے ہوئے کینسر کے خلیات کو بالکل تباہ کرسکتا ہے۔ایل آئی این اے سی کینسر کے علاج میں ایک سنگ بنیاد ہے اور کینسر کے مریضوں کی اکثریت میں کینسر کے علاج کی سب سے زیادہ شرح حاصل کرنے کے لئے بنیادی ہے۔وزیر صحت و طبی تعلیم، سماجی بہبود اور تعلیم سکینہ مسعود نے اِس اہم پیش رفت پر اظہار خیال کرتے ہوئے اس بات پر زور دیا کہ عمر عبداللہ کی قیادت والی حکومت جموں و کشمیر کے لوگوں کو جدید طبی خدمات فراہم کرنے کے لئے پُرعزم ہے۔اُنہوں نے کہا کہ صحت شعبہ حکومت کی ترجیحی شعبہ ہے اور ہم یہاں کے لوگوں کو عالمی معیار کی طبی سہولیات فراہم کرنے کے لئے پُرعزم ہیں۔ اُنہوں نے کہا ،’’یہ اقدامات اس سمت میں اٹھائے گئے ہیں اور حکومت نے جموں و کشمیر میں کینسر کے علاج کی سہولیات کو بڑھانے کے لئے جو کوششیں شروع کی ہیں ان میں سے ایک ہے۔‘‘وزیر موصوفہ نے اس بات پر روشنی ڈالی کہ ایل آئی این اے سی کی خریداری کے لئے حکومت کے اقدام سے جموں و کشمیر میں کینسر کے علاج کے نتائج میں نمایاں بہتری آنے کی توقع ہے۔ اُنہوںنے مزید کہا کہ سکمز میں اس سہولیت کے قیام کے بعد مریضوںبالخصوص معاشی طور پر کمزور طبقوں سے تعلق رکھنے والے مریضوں کو کینسر کے جدید علاج کے لئے باہر جانے کی ضرورت نہیں پڑے گی۔اُنہوںنے مزید کہا کہ اس سہولیت سے ان کنبوں پر مالی بوجھ بھی کم ہوگا جو اپنے مریضوں کے علاج کے مرحلے کے دوران مشکل وقت سے گزر رہے ہیں۔یہ بات قابلِ ذِکر ہے کہ این پی سی ڈی سی ایس سکیم کے تحت سٹیٹ کینسر اِنسٹی چیوٹ کے لئے سکمز کے ذریعے جے کے ایم ایس سی ایل سے 29 کروڑ روپے کی تخمینہ لاگت سے ایل آئی این اے سی کی خریداری کی جائے گی۔