صدر جی این وار نے ان قدام کو قابل تحسین قرار دیا، طلبہ کی ماحول کے تئیں ذمہ داری پر زور دیا
سرینگر//محکمہ سوشل فارسٹری بڈگام نے جمعرات کوالاسماء اسکول بڈگام میں ’’ایک پیڑ ماں کے نام ‘‘کے موضوع پر ایک شجرکاری مہم کامیابی کے ساتھ منعقد کی۔ اس تقریب کی صدارت جی این وار، صدر پرائیویٹ اسکولز ایسوسی ایشن جے کے اور محمد مقبول لون، رینج فاریسٹ آفیسر، بڈگام نے کی۔ کشمیر پریس سروس کے موصولہ بیان کے مطابق شجرکاری مہم میں کئی معزز شخصیات نے جوش و خروش کے ساتھ شرکت کی جن میں عبدالمجید پرے سوشل فاریسٹری آفیسر، آغا سید، چیئرمین الاسماء ایجوکیشنل انسٹی ٹیوٹ بڈگام، نیلم جی پرنسپل الاسماء ایجوکیشنل انسٹی ٹیوٹ اور ظہور احمد خان سوشل فاریسٹری ڈیپارٹمنٹ شامل تھے۔ اس کے علاوہ اس خاص تقریب میں اسکول ہذاکے تمام اساتذہ اور طلبہ نے شرکت کی۔شجرکاری مہم کے بعد ایک حلف برداری کی تقریب بھی منعقد کی گئی جس میں تمام شرکاء نے درخت لگانے اور ایک سرسبز اور صاف ماحول کے لیے کام کرنے کا عہد کیا۔پرائیویٹ اسکولز ایسوسی ایشن جے کے, کے صدر جی این وار نے کہا کہ یہ شجرکاری مہم ایک شاندار اقدام ہے جو نہ صرف ہمارے ماحول کی خوبصورتی میں اضافہ کرتا ہے بلکہ ہمارے طلبہ میں فطرت کے تئیں ذمہ داری کا احساس بھی پیدا کرتا ہے۔ مجھے ایسے معنی خیز پروگرام کا حصہ بن کر اچھا محسوس ہو رہا ہے۔سوشل فاریسٹری ڈیپارٹمنٹ کے عہدیدار عبدالمجید پرے نے کہا کہ “ایک پیڑ ماں کے نام پروگرام ہمارے پائیدار مستقبل کے عزم کا ثبوت ہے۔ کمیونٹی کو خاص طور پر نوجوان نسل کو شامل کرکے ہم ماحولیاتی شعور کے بیج بو رہے ہیں جو ہم سب کے لیے فائدہ مند ہوگا۔الاسماء ایجوکیشنل انسٹی ٹیوٹ بڈگام کے چیئرمین آغا سید نے کہا کہ آج کا واقعہ ہمارے مشن کا ایک قدم ہے جس میں ہم ایک ماحول دوست کیمپس بنانے کے لیے کوشاں ہیں۔ میں سوشل فاریسٹری ڈیپارٹمنٹ کی حمایت اور ہمارے طلبہ اور عملے کی جوش و خروش کے ساتھ شرکت کے لیے شکر گزار ہوں۔ پرنسپل محترمہ نیلم نے کہا کہ ہمارے طلبہ نے آج درختوں اور ماحول کی اہمیت کے بارے میں ایک قیمتی سبق سیکھا ہے۔ یہ شجرکاری مہم اس بات کی عمدہ مثال ہے کہ کس طرح تعلیم کو عمل کے ساتھ ملا کر مثبت اثر ڈالا جا سکتا ہے۔”
