جموں وکشمیر راج بھون میں اُترپردیش کا یوم تاسیس منایا گیا

جموں// اتر پردیش کا یوم تاسیس آج راج بھون جموں میں بڑی شان و شوکت کے ساتھ منایا گیا۔ اِس تقریب میںسینئر سرکاری اَفسران، طلبأ اور جموں و کشمیر میں رہنے والے اُتر پردیش کے لوگوں نے شرکت کی جو خصوصی مدعو تھے۔ اِس موقعہ پر لیفٹیننٹ گورنر منوج سِنہا نے اُتر پردیش کے لوگوں اور معزز مہمانوں کو مبارک باد پیش کی۔اُنہوں نے کہا کہ اُتر پردیش بھگوان رام، بھگوان شری کرشنا، ویدوں اور اپنشدوں کی سرزمین بھی ہندوستان کی تہذیب اور سنسکار کا گہوارہ ہے۔ میری دعا ہے کہ ریاست ترقی کی راہ پر گامزن ہوتی رہے ۔لیفٹیننٹ گورنر نے اُتر پردیش کی شاندار تاریخ کو یاد کیا اور ریاست کے مجاہدین آزادی اور عظیم شخصیات کو بھی خراج عقیدت پیش کیا جنہوں نے جدید ہندوستان کی تعمیر میں بے پناہ خدمات اَنجام دیں۔فن کاروں نے روایتی لباس میںمسحور کن پرفارمنس سے اُتر پردیش کی خوبصورتی اور مقامی ثقافت کو ظاہر کیا اور کثرت میں وحدت کے جذبے کو اُجاگر کیا۔