’’ ون نیشن ، ون الیکشن ‘‘کا انعقاد قومی مفاد میں ، اس کا کسی خاص سیاسی پارٹی سے کوئی لینا دینا نہیں

انتخابات کا انعقاد عوام کیلئے فائدہ مند ثابت ہو گا ،بچا ہوا ریونیو ترقیاتی کاموں کیلئے استعمال ہو گا :رام ناتھ کوند

سرینگر// ’’ ون نیشن ، ون الیکشن ‘‘کا انعقاد قومی مفاد میں ہے اور اس کا کسی خاص سیاسی پارٹی سے کوئی لینا دینا نہیں ہے کی بات کرتے ہوئے سابق صدر ہند رام ناتھ کوند نے کہا کہ ایک ساتھ انتخابات کا انعقاد عوام کیلئے فائدہ مند ثابت ہو گا کیونکہ بچا ہوا ریونیو ترقیاتی کاموں کیلئے استعمال ہو گا۔سٹار نیوز نیٹ ورک کے مطابق ملک کے سابق صدر رام ناتھ کووند، جو ’’ایک قوم، ایک انتخاب‘‘کے امکان کو تلاش کرنے والی کمیٹی کے سربراہ ہیںنے کہا کہ بیک وقت انتخابات کا انعقاد قومی مفاد میں ہے اور اس کا کسی خاص سیاسی پارٹی سے کوئی لینا دینا نہیں ہے۔ایک نجی دورے پر صحافیوں سے بات کرتے ہوئے انہوں نے کہا ’’ایک ساتھ انتخابات کا انعقاد عوام کے لیے فائدہ مند ثابت ہو گا کیونکہ بچا ہوا ریونیو ترقیاتی کاموں کے لیے استعمال ہو گا‘‘۔ انہوں نے کہا ’’میں تمام سیاسی جماعتوں سے تعاون کرنے کی درخواست کر رہا ہوں کیونکہ یہ قومی مفاد میں ہے۔ کسی سیاسی جماعت کا اس سے کوئی لینا دینا نہیں ہے۔ ‘‘ خیال رہے کہ حکومت نے اس سال کے شروع میں کووند کی سربراہی میں اعلیٰ سطحی آٹھ رکنی کمیٹی تشکیل دی تھی۔سابق صدر نے کہا’’کئی کمیٹیوں جیسے پارلیمانی کمیٹی، نیتی آیوگ، الیکشن کمیشن آف انڈیا، اور دیگر نے کہا ہے کہ ملک میں ’’ایک ملک ایک انتخاب‘‘کی روایت کو بحال کرنے کی ضرورت ہے۔ حکومت نے اس مقصد کیلئے ایک کمیٹی تشکیل دی ہے اور مجھے اس کا چیئرمین بنایا ہے۔ ہم لوگوں کے ساتھ مل کر کام کر رہے ہیں اور حکومت کو تجاویز دیں گے کہ ہم اس روایت کو دوبارہ کیسے نافذ کر سکتے ہیں‘‘ ۔ میں نے تمام رجسٹرڈ قومی جماعتوں سے بھی رابطہ کیا ہے اور ان سے تجاویز مانگی ہیں۔ کسی وقت ان سب نے اس کی حمایت کی۔ ہم تمام سیاسی جماعتوں سے تعاون کی درخواست کرتے ہیں کیونکہ یہ قومی مفاد میں ہے۔اس بات پر زور دیتے ہوئے کہ ’’ایک ملک، ایک انتخاب‘‘سے کسی خاص سیاسی پارٹی کو فائدہ نہیں ہوگا، کووند نے کہا’’اگر اس پر عمل درآمد ہوتا ہے، تو مرکز میں اقتدار میں رہنے والی پارٹی کو فائدہ ہوگا، چاہے وہ بی جے پی ہو یا کانگریس یا کوئی اور پارٹی۔ کوئی امتیاز نہیں ہے‘‘۔کووند نے کہا کہ سب سے زیادہ فائدہ عام لوگوں کو ہوگا کیونکہ بچائے گئے ریونیو کو ترقیاتی کاموں کے لیے استعمال کیا جائے گا۔ستمبر میں کمیٹی کی پہلی میٹنگ میں، پینل نے کمیٹی کے طریقہ کار کا خاکہ پیش کیا اور فیصلہ کیا کہ تسلیم شدہ قومی جماعتوں، ریاستوں میں حکومت رکھنے والی جماعتوں، پارلیمنٹ میں ان کے نمائندے رکھنے والی جماعتوں، اور دیگر تسلیم شدہ ریاستی جماعتوں کو ان کی تجاویز/نظریات طلب کرنے کے لیے مدعو کیا جائے۔ ملک میں بیک وقت انتخابات کے معاملے پر۔