عدالت عظمیٰ کی طرف سے ایسا کوئی حکم نہیں دیا گیا تھا جس میں انہیں ذاتی طور پر پیش ہونے کو کہا
سری نگر//سپریم کورٹ جمعہ کے روز جموں و کشمیر لبریشن فرنٹ (جے کے ایل ایف) کے کمانڈر یاسین ملک کو عدالت میں پیش ہونے کے لئے تیار دیکھ کر حیران رہ گیا کیونکہ اس نے نوٹ کیا کہ عدالت عظمیٰ کی طرف سے ایسا کوئی حکم نہیں دیا گیا تھا جس میں انہیں ذاتی طور پر پیش ہونے کو کہا گیا ہو۔کشمیر نیوز سروس ( کے این ایس ) ڈیسک کے مطابق مرکزی حکومت نے بھی سپریم کورٹ میں یاسین ملک کی جسمانی پیشی پر تشویش کا اظہار کیا۔ یاسین ملک، جو دہشت گردی کی فنڈنگ کے معاملے میں قصوروار ٹھہرائے جانے کے بعد تہاڑ جیل میں عمر قید کی سزا کاٹ رہے ہیں، کو جموں کی عدالت کے حکم کے خلاف سی بی آئی کی درخواست پر سماعت کے لیے سپریم کورٹ میں پیش کیا جانا تھا۔مرکز کی طرف سے پیش ہوتے ہوئے سالیسٹر جنرل تشار مہتا نے عدالت کو مطلع کیا کہ عدالت عظمیٰ کی طرف سے ایسا کوئی حکم نہیں دیا گیا ہے کہ یاسین ملک کو اس معاملے میں عدالت عظمیٰ کے سامنے جسمانی طور پر پیش کیا جائے۔جسٹس سوریہ کانت اور دیپانکر دتا کی بنچ نے اس معاملے کی سماعت سے انکار کر دیا لیکن نوٹ کیا کہ یاسین ملک کو اس کے سامنے پیش ہونے کو کہتے ہوئے ایسا کوئی حکم نہیں دیا گیا تھا۔سالیسٹر جنرل تشار مہتا نے سپریم کورٹ کو بتایا کہ وزارت داخلہ نے ہدایت جاری کی ہے کہ انہیں جیل سے باہر نہیں لایا جائے گا۔اتفاق سے انہیں جموں کورٹ کے خلاف سی بی آئی کی عرضی میں شرکت کے لیے آج سپریم کورٹ میں پیش کیا گیا۔ ایڈیشنل سالیسٹر جنرل ایس وی راجو نے اسے سیکورٹی کا سنگین مسئلہ قرار دیا۔سپریم کورٹ نے یہ بھی ریمارکس دیے کہ عدالت میں پیشی کے لیے ورچوئل طریقے موجود ہیں۔جسٹس کانت نے چار ہفتوں کے بعد معاملہ درج کیا اور کہا کہ اس کی سماعت کسی اور بنچ کے ذریعہ کی جائے جس میں جسٹس دتا بنچ کے رکن نہیں ہیں۔سی بی آئی نے ایڈیشنل سیشن جج، جموں (TADA/POTA) کے 20ستمبر اور 21 ستمبر کو دو مختلف معاملات میں اس کے خلاف پروڈکشن وارنٹ جاری کرنے کے حکم کے خلاف اپیل دائر کی ہے۔جموں کی عدالت نے 1989 میں ہندوستانی فضائیہ (آئی اے ایف) کے چار اہلکاروں کے قتل اور مفتی محمد سعید کی بیٹی روبیہ سعید کے اغوا کے سلسلے میں گواہوں سے جرح کے لیے ملک کی جسمانی پیشی مانگی ہے۔ تاہم، سپریم کورٹ نے گزشتہ سماعت میں جموں کی عدالت کے حکم پر روک لگا دی۔
