پنچایت، ضلع ترقیاتی کونسل یاکوئی اور انتخابات،نیشنل کانفرنس لڑنے کیلئے تیار

ملک میں جمہوریت کی حفاظت کیلئے اپوزیشن کامتحدہونا انتہائی ضروری:ڈاکٹر فاروق

سری نگر//نیشنل کانفرنس کے صدرڈاکٹر فاروق عبداللہ نے پیر کو کہا کہ ان کے پاس کوئی جادوئی چراغ نہیں ہے جو اگلے سال ہونے والے پارلیمانی انتخابات سے قبل اپوزیشن کے اتحاد کی پیش گوئی کر سکیں لیکن انہوں نے کہا کہ غیر بی جے پی جماعتوں کو ملک میںجمہوریت کی حفاظت کے لئیکٹھے ہونے کی ضرورت کا احساس کرنا چاہیے۔ جے کے این ایس کے مطابق ڈاکٹر فاروق عبداللہ نے جموں میں پارٹی ہیڈکوارٹر میں نامہ نگاروں کو بتایا کہ میرے پاس کوئی جادوئی چراغ نہیں ہے جس سے اپوزیشن پارٹیوں کے اتحاد کی پیشن گوئی کی جا سکے (2024 کے لوک سبھا انتخابات سے پہلے)۔تاہم انہوںنے کہاکہ اپوزیشن کومتحدہ محاذ بنانے کی کوششیں جاری ہیں اور ہمیں امید ہے کہ اچھی عقل غالب آئے گی اور وہ سب اکٹھے ہوں گے۔انہوں نے کہا کہ جموں و کشمیر کے سابق گورنر ستیہ پال ملک نے بھی پارلیمانی انتخابات میں بی جے پی کا مقابلہ کرنے کے لیے اپوزیشن اتحاد کی حمایت کی ہے۔ڈاکٹر فاروق کاکہناتھاکہ ستیاپال ملک نے (ماضی میں) بہت سی چیزیں کہی ہیں۔انہوں نے2019 کے پلوامہ حملے کے بارے میں بات کی، کس طرح 5طیاروں کی درخواست کو مسترد کر دیا گیا اور 700 ٹرکوں کو ایک ایسی سڑک پر جانا پڑا جو مکمل طور پر سینیٹائز نہیں تھی، جو ایک المیہ ہے۔جموں و کشمیر کے سابق وزیر اعلیٰ نے کہا کہ نیشنل کانفرنس جموں وکشمیر میں اسمبلی انتخابات کی بھیک نہیں مانگے گی کیونکہ بقول موصوف وہ (بی جے پی) جمہوریت کو روند رہے ہیں۔انہوں نے کہا کہ ہندوستان ایک جمہوری ملک ہے اور آپ لوگوں کو ان کے حق سے محروم کر رہے ہیں۔تاہم، ڈاکٹر فاروق نے زوردیکر کہاکہ نیشنل کانفرنس اس معاملے کے لیے پنچایت اور ضلع ترقیاتی کونسل کے انتخابات یا اسمبلی انتخابات لڑنے کیلئے تیار ہے، جب بھی وہ منعقد ہوں۔انہوںنے کہاکہ اللہ کا شکر ہے، کچھ تو ہو رہا ہے، کم از کم پنچایتی انتخابات تو ہوں گے۔ یہ جمہوریت کی بنیاد ہے اور ہم کسی بھی انتخابات کو نہیں چھوڑیں گے۔فاروق عبداللہ نے مزید کہا کہ انہیں پرواہ نہیں ہے کہ اسمبلی انتخابات کب ہوں گے۔انہوں نے کہا کہ انہیں فیصلہ کرنے دیں کہ وہ کب اسمبلی انتخابات کرانے جا رہے ہیں، ہم تیار ہیں۔