سری نگر// رواں سال یکم مارچ سے یکم مئی تک 19کلوگرام وازنی کمرشل رسوئی گیس سلنڈرکی قیمت میں 475روپے50پیسے کااضافہ کیاگیا ہے ،اوراب ایک سلنڈرکی قیمت2355روپے50پیسے ہوگئی ہے ۔جے کے این ایس کے مطابق اتوار کو 19 کلووزنی کمرشل ایل پی جی سلنڈر کی قیمت میں102.50 روپے کا اضافہ کیا گیا ہے، جس کے بعد اب اس سلنڈرکی قیمت2253 روپے کے مقابلے 2355.50 روپے ہو گئی ہے۔اسکے ساتھ ہی 5 کلو کے ایل پی جی سلنڈر کی قیمت اب 655 روپے ہے۔اس سے قبل یکم اپریل کو19 کلوگرام کمرشل ایل پی جی کی قیمت میں250 روپے فی سلنڈر کا اضافہ کیا گیا تھا۔ اوراسکی قیمت 2253روپے ہوگئی تھی جبکہ کمرشل ایل پی جی کی قیمت میں پہلے یکم مارچ کو105 روپے کا اضافہ کیا گیا تھا۔دریں اثنا، آئل مارکیٹنگ کمپنیاں، جن میں انڈین آئل کارپوریشن، ہندوستان پیٹرولیم کارپوریشن اور بھارت پیٹرولیم کارپوریشن شامل ہیں، اجولا دیوس منانے کے لیے آج ملک بھر میں5000 سے زیادہ ایل پی جی پنچایتوں کا اہتمام کرنے والی ہیں۔تجربے کے تبادلے کے علاوہ، جس کا مقصد مائع پیٹرولیم گیس (ایل پی جی) کے محفوظ اور پائیدار استعمال کے لیے ہے، تیل کی مارکیٹنگ کمپنیاں صارفین کے اندراج کو زیادہ سے زیادہ کرنے کی کوششیں بھی کریں گی۔پردھان منتری اجولا یوجنا سماجی شمولیت کے لیے وزیر اعظم نریندر مودی حکومت کی ایک مقبول پہل ہے۔ اسکیم کے تحت ہر بی پی ایل گھرانے کو مفت ایل پی جی کنکشن فراہم کیا جاتا ہے۔
