جنگلات کی سرگرمیوں کو ایم جی نریگاکیساتھ ملانے پر کمشنر سیکرٹری جنگلات کی صدارت میں میٹنگ منعقد

جموں//جنگلات سے متعلق سرگرمیوں کو ایم جی نریگا کے ساتھ ملا کر افرادی قوت اور مشینری کو فعال بنانے سے ’’ ہر گاؤں ہریالی ‘‘ اسکیم کو کامیاب بنانے کیلئے کم از کم 5 کروڑ کام دن مہیا ہوں گے ۔ ان باتوں کا اظہار کمشنر سیکرٹری جنگلات و ماحولیات سنجیو ورما نے آج محکمہ دیہی ترقی کے ساتھ جنگلات کے افسران کی ایک میٹنگ کی صدارت کے دوران کیا ۔ میٹنگ میں پی سی سی ایف اور ایچ او ایف جے اینڈ کے موہت گیرا ، ڈائریکٹر سوشل فارسٹری روشن جگی ، ڈائریکٹر سوئل اینڈ کنزرویشن ڈیپارٹمنٹ ڈاکٹر ٹی ایس اشوک ، ڈپٹی کمشنرز ، محکمہ دیہی ترقی کے ڈائریکٹرز اور جموں و کشمیر یو ٹی کے تمام اے سی ڈی ایس اور ڈی ایف اوز نے شرکت کی ۔ میٹنگ میں بتایا گیا کہ جے کے گرین ڈرائیو کے تحت موجودہ مالی سال 2021-22 کے دوران 1.30 کروڑ پودے لگانے کے ہدف کے مقابلے میں اب تک 79.79 لاکھ پودے لگائے جا چکے ہیں ۔ کمشنر سیکرٹری برائے حکومت فاریسٹ ایکولوجی اینڈ انوائیرنمنٹ ڈیپارٹمنٹ نے جنگلات کے حقوق کے قانون سے متعلق دعووں کی کارروائی پر توجہ دی ۔ انہوں نے تمام ڈی سیز /ڈی ایف اوز پر زور دیا کہ وہ قاعدے کے تحت تمام زیر التوا دعووں کو جلد از جلد کلیئر کرنے اور کلیموں کی تصدیق کو مستعدی سے کریں ۔ میٹنگ میں ڈی ایف اوز اور اے سی ڈیز کی طرف سے دکھائے گئے کوارڈینیشن اور ہم آہنگی کو سراہا گیا جس کی وجہ سے جنگلات سے متعلق کاموں کو انجام دینے میں ہم آہنگی بڑھ رہی ہے ۔