بارہمولہ//چیئرپرسن ڈِسٹرکٹ ڈیولپمنٹ کونسل بارہمولہ کی سفینہ بیگ نے ضلع ترقیاتی کمشنر بارہمولہ منگا شیرپا کی موجودگی میں آج جیٹی بارہمولہ میں ڈی ڈی سی آفس کی نئی عمارت کا سنگ بنیاد رکھا۔یہ تقریب ایک اہم بنیادی ڈھانچے کے منصوبے کے آغاز کی نشاندہی کرتی ہے جس کا مقصد ضلع میں اِنتظامی کارکردگی اور خدمات کی فراہمی کو بڑھانا ہے۔ڈی ڈی سی آفس کی نئی عمارت جس کی تخمینہ لاگت 285.38 لاکھ روپے ہے ایک تاریخی ڈھانچہ بننے کے لئے تیار ہے جو عوامی سہولیات اورحکمرانی کو بہتر بنانے کے لئے مقامی حکومت کے عزم کی عکاسی کرتی ہے۔ توقع ہے کہ اس منصوبے سے ڈی ڈی سی کے لئے ایک جدید ، اچھی طرح سے لیس ورک سپیس فراہم ہوگا جس سے ترقیاتی سکیموں اور پروگراموں کے بہتر تال میل اور عمل آوری میں سہولیت ہوگی۔ چیئرپرسن ڈی ڈی سی نے تقریب سے خطاب کرتے ہوئے مقامی اِنتظامیہ کے لئے اس منصوبے کی اہمیت پر روشنی ڈالی۔ اُنہوں نے کہا کہ یہ نئی دفتری عمارت ان کی آپریشنل صلاحیتوں میں نمایاں اضافہ کرے گی اور اس بات کو یقینی بنائے گی کہ وہ بارہمولہ کے عوام کی زیادہ مؤثر طریقے سے خدمت کرسکیں۔ اُنہوں نے مزید کہا کہ یہ خطے میں ترقی کے لئے ہماری لگن کا ثبوت ہے۔ضلع ترقیاتی کمشنر بارہمولہ نے مقامی کمیونٹی پر اس منصوبے کے مثبت اثرات پر زور دیتے ہوئے کہا کہ یہ سنگ بنیاد صرف ایک عمارت کے لئے نہیں ہے بلکہ بارہمولہ کی مستقبل کی ترقی اور خوشحالی کے لئے ہے۔ اُنہوں نے کہا کہ ضلعی اِنتظامیہ اس منصوبے کو بروقت اور اعلیٰ معیار کے مطابق مکمل کرنے کے لئے پُرعزم ہے۔سنگ بنیاد رکھنے کی تقریب میں ڈِسٹرکٹ ڈیولپمنٹ کونسل کے ممبران، ایڈیشنل ڈِسٹرکٹ ڈیولپمنٹ کمشنر بارہمولہ سیّد قمر سجاد ، چیف پلاننگ آفیسر جاوید احمد، اسسٹنٹ کمشنر ریونیو ارشد احمد، اسسٹنٹ کمشنرڈیولپمنٹ شبیر احمد حقاک، اسسٹنٹ کمشنر پنچایت عباد الرحمان، تحصیل دار بارہمولہ اور دیگر افسران اورملازمین نے شرکت کی۔
