گاندربل //پنچایت سیکرٹری ،ضلع ترقیاتی کمشنر گاندربل کے لئے جے کے ایس ایس بی او ایم آر پر مبنی تحریری اِمتحان کے سلسلے میں شیامبیر نے منی سیکرٹریٹ گاندربل کے کانفرنس ہال میں اِنتظامات کو حتمی شکل دینے کے لئے ایک میٹنگ طلب کی۔میٹنگ کے آغاز میںسیکورٹی پلان، سٹرانگ روم کی نشاندہی، گرمائش کے اِنتظامات، تربیت، اِمتحانی مراکز میں کمروں کی شناخت اور افرادی قوت، ، بجلی، پانی اور دیگر متعلقہ سہولیات کو کامیاب بنانے کے حوالے سے تفصیلی تبادلہ خیال کیا گیا۔میٹنگ میں بتایا گیا کہ ضلع کے 15 مراکز میں اِمتحانات منعقد کئے جائیں گے اور ان مراکز پر سپراِنٹنڈنٹ، مجسٹریٹوں اور انویجی لیٹروں کو تعینات کرنے کا حکم جاری کیاگیا ہے۔میٹنگ میں فیصلہ لیاگیا کہ ضلع میں امتحان کے دن تمام امتحانی مراکز کے ارد گرد سی آر پی سی کی دفعہ 144 نافذ کیا جائے گا۔ اس کے علاوہ ان آفیشلزکو خصوصی پاس جاری کئے جائیں گے جنہیں ایس ایس بی کے آئندہ امتحانات کے اَحسن اِنعقاد کو یقینی بنانے کی ذمہ داری تفویض کی گئی ہے ۔ضلع ترقیاتی کمشنر نے متعلقہ افسران کو ہدایت دی کہ وہ امتحانات کے سلسلے میں جے کے ایس ایس بی کے جاری کردہ ایس او پیز پر سختی سے عمل کریں اور پنچایت سیکرٹری امتحان کے بغیر کسی رکاوٹ کے انعقاد کے لئے ضروری سہولیات جیسے گرمائش، پینے کا پانی، صفائی، مناسب روشنی اور دیگر سہولیات موجود ہیں۔اُنہوں نے مزید متعلقہ محکموں کو ہدایت جاری کی کہ وہ امتحان کے کامیاب اِنعقاد کو یقینی بنانے کے لئے مربوط انداز میں کام کریں۔اسسٹنٹ ریجنل ٹرانسپورٹ آفیسر کو ہدایت دی گئی ہے کہ وہ ایک جامع روٹ پلان مرتب کریں، سٹرانگ روم سے امتحانی مراکز تک اِمتحانی مواد کی ٹرانسپورٹیشن کے لئے لاجسٹک کوآرڈی نیشن میں اضافہ کریں۔ اِس کے علاوہ ڈسٹرکٹ ٹریجریری آفیسر کو سٹرانگ روم میں سی سی ٹی وی کیمرے لگانے کی ہدایت دی گئی ہے۔ضلع ترقیاتی کمشنر نے اِفتتاحی اور اختتامی طریقہ کار کے دوران اِمتحانی مواد کی ویڈیو گرافی کی اہمیت پر زور دیتے ہوئے اے ڈی سی کو ہدایت دی کہ وہ پنچایت سیکرٹری امتحان کے لئے شفافیت اور حفاظتی اَقدامات کو تقویت دینے کے لئے کافی ویڈیو گرافروں کی تعیناتی کو یقینی بنائیں۔میٹنگ میں ایڈیشنل ڈپٹی کمشنر گلزار احمد ، اسسٹنٹ کمشنر ریونیو، سب ڈویژنل مجسٹریٹ کنگن، چیف ایجوکیشن آفیسر، اسسٹنٹ ریجنل ٹرانسپورٹ آفیسر، ڈسٹرکٹ ٹریجریری آفیسر، ڈی وائی ایس پی ہیڈکوارٹر، سپراِنٹنڈنٹوں، مجسٹریٹوںاور دیگر متعلقہ اِفسران نے شرکت کی۔
