محکمہ موسمیات نے مقامی سطح پر شدید بارشوں اور بادل پھٹنے کے امکان سے خبردار کیا
سرینگر/ / جموں و کشمیر کے مختلف علاقوں میں بدھ کو موسلا دھار بارشوں کے باعث ندی نالوں میں طغیانی آگئی جبکہ کشمیر کے کئی علاقوں میں اچانک سیلاب کی صورتحال پیدا ہوگئی۔ محکمہ موسمیات نے اگرچہ وسیع پیمانے پر بارش کے امکان کو مسترد کیا ہے، تاہم بعض علاقوں میں مختصر مدت کے دوران شدید بارش، گرج چمک اور بادل پھٹنے جیسے واقعات کے امکان سے خبردار کیا ہے۔شوپیاں کے شاداب کریوا علاقے میں شدید بارش کے بعد ایک مقامی نالے میں پانی کی سطح اچانک بڑھ گئی، جس کے نتیجے میں پانی، مٹی اور کیچڑ علاقے میں پھیل گیا۔ ضلع کے دچنو اور ہیرپورہ علاقوں میں بھی اچانک سیلاب کی اطلاعات موصول ہوئیں جہاں ندی نالوں کا پانی باغات میں داخل ہوگیا۔ بدرہما گاؤں بھی اچانک سیلاب سے متاثر ہوا۔گاندربل ضلع کے ہکنار اور گنڈ علاقوں میں بھی شدید بارش کے بعد اچانک سیلاب آیا، تاہم حکام کے مطابق ان واقعات میں کسی جانی نقصان یا املاک کو نقصان کی اطلاع نہیں ملی۔ پہلگام کے بالائی بٹکوٹ علاقے میں بھی سیلابی صورتحال پیدا ہوئی جس سے سڑک رابطے اور پانی کی فراہمی متاثر ہوئی۔ادھر جموں صوبے میں شدید بارشوں کے نتیجے میں ندی نالوں اور دریاؤں میں پانی کی سطح بلند ہوگئی۔ حکام نے نشیبی علاقوں اور آبی ذخائر کے قریب جانے سے گریز کرنے کی اپیل کرتے ہوئے الرٹ جاری کیا۔محکمہ موسمیات کے مطابق 19 سے 22 اگست تک موسم عمومی طور پر گرم اور مرطوب رہنے کا امکان ہے، تاہم مختلف مقامات پر ہلکی سے درمیانی بارش اور گرج چمک ہوسکتی ہے۔ بعض اضلاع میں صبح سویرے اور دوپہر کے وقت مختصر مگر شدید بارش کا امکان بھی ظاہر کیا گیا ہے۔محکمہ نے خبردار کیا ہے کہ مقامی سطح پر ہونے والی شدید بارشیں اچانک سیلاب، مٹی کے تودے گرنے اور لینڈ سلائیڈنگ کا سبب بن سکتی ہیں۔ لوگوں کو دریاؤں، ندی نالوں اور لینڈ سلائیڈنگ کے خطرے والے علاقوں سے دور رہنے اور مقامی انتظامیہ کی ہدایات پر عمل کرنے کا مشورہ دیا گیا ہے۔دریں اثنا، وقفے وقفے سے ہونے والی بارش اور مختلف مقامات پر مٹی کے تودے گرنے کے باوجود سرینگر۔جموں قومی شاہراہ بدھ کو دونوں سمتوں میں ضابطہ بند ٹریفک کے لئے کھلی رہی، تاہم کئی حساس مقامات پر ٹریفک کی رفتار سست رہی۔ مسافروں کو سفر شروع کرنے سے قبل شاہراہ کی تازہ صورتحال معلوم کرنے کی ہدایت دی گئی ہے۔حکام نے کہا کہ موسم اور سڑک کی صورتحال سازگار رہنے کی صورت میں شاہراہ کو جمعرات کو بھی دونوں سمتوں میں ضابطہ بند ٹریفک کے لئے کھلا رکھا جائے گا۔
