ڈوڈہ//ضلع ترقیاتی کمشنر ڈوڈہ ہرویندر سنگھ نے آج ڈوڈہ میں ڈی سی آفس کمپلیکس کے کانفرنس ہال میں دسویں بین الاقوامی یوگا ڈے کی تیاریوں کا جائزہ لینے کے لئے ایک میٹنگ کی صدارت کی۔میٹنگ میں اَیڈیشنل ڈپٹی کمشنر سدرشن کمار، اے سی آر سنیل بھٹیال، اے سی ڈی منوج کماری، ڈی آئی او ڈوڈہ، نثاق الفاروق، سی ای او پی ایل تھاپا، ڈِسٹرکٹ آیوش آفیسر اجے کول، ڈِسٹرکٹ یوتھ سروسز اینڈ سپورٹس آفیسر اور پی ایچ ای، جے کے پی ڈی سی ایل، ایگزیکٹیو اِنجینئران میکنیکل ڈویژن اور ڈوڈہ، بھدرواہ اور ٹھٹھری کے ایگزیکٹیو افسران نے شرکت کی۔میٹنگ میں بنیادی توجہ بجلی کی فراہمی، زمین کی تیاری، صفائی ستھرائی، نیٹ ورک سہولیات اور پبلک ایڈریس سسٹم جیسے انتظامات کا جائزہ لینے پر تھی۔ضلع ترقیاتی کمشنر نے ایگزیکٹیواِنجینئر آر اینڈ بی کو ہدایت دی کہ وہ یوگا ڈے کی تقریبات کے لئے ڈوڈہ کے سپورٹس سٹیڈیم میں سٹیج کا انتظام کریں۔ ڈی آئی او انفارمیٹکس کو یوگا ڈے پر وزیر اعظم کے پروگرام کی براہ راست نشریات کے لئے ایک بڑی ایل ای ڈی سکرین قائم کرنے کے لئے کہا گیا ہے۔ سی ای او کو سکولی طلبأ کی شرکت کا انتظام کرنے کی ذمہ داری سونپی گئی تھی جبکہ ڈِسٹرکٹ یوتھ سروسز اینڈ سپورٹس آفیسر کو کھیلوں کے نوجوانوں کو لانے کے لئے کہا گیا ہے۔ڈسٹرکٹ پروگرام پروجیکٹ آفیسر سے کہا گیا کہ وہ اس بات کو یقینی بنائیں کہ آشا کارکنان تقریب میں شرکت کریں۔ یہ فیصلہ کیا گیا کہ ڈوڈہ میں ضلع ہیڈکوارٹر بھدرواہ کے سپورٹس سٹیڈیم اور گتھا ریزورٹ پارک میں بین الاقوامی یوگا ڈے کا انعقاد کرے گا۔ ضلع آیوش آفیسر کو اس پروگرام کے لئے تقریبا 1000 یوگا میٹ کا انتظام کرنے کے لئے کہا گیا ۔ اے ایس پی ڈوڈہ کو ہدایت دی گئی کہ وہ سیکورٹی کے لئے نیم فوجی دستوں اور پولیس اہلکاروں کو شامل کریں۔ ایگزیکٹیو افسران سے کہا گیا کہ وہ بیت الخلأ کی سہولیات فراہم کریں اور مقامات پر صفائی ستھرائی کو یقینی بنائیں۔مزید برآں ،ایگزیکٹیو انجینئر جے کے پی ڈی سی ایل سے کہا گیا کہ وہ تقریب کے دوران کسی بھی رکاوٹ سے بچنے کے لئے پاور بیک اپ کا اِنتظام کریں۔
