مچھلیوں کی آبادی میں کمی، ماہی گیر وں روزی روٹی کوخطرہ لاحق:ارشاد رسول کار
سری نگر//براعظم ایشیا کی سب سے وسیع قدرتی آبگاہ جھیل وُل کی بگڑتی ہوئی حالت پر گہری تشویش ظاہر کرتے ہوئے نیشنل کانفرنس کے رہنما ارشاد رسول کار نے کہا کہ نہ رکنے والی انسانی مداخلت اور سرکاری سطح پر غیر سنجیدگی نے کئی مسائل کو جنم دیاجو اب اس جھیل کی تیزی کیساتھ تنزلی کاموجب بن رہے ہیں ۔جے کے این ایس کے مطابق اپنے ایک بیان میں ارشاد رسول کار نے کہا ہے کہ ولر جھیل کی بقا کی راہ میں بے شمار مسائل حائل ہیں اور اس طرح ان لوگوں کی بقاء کوبھی خطرہ لاحق ہواہے، جو اس پر مکمل انحصار کرتے ہیں۔نیشنل کانفرنس لیڈر نے کہا کہ لوگ اپنی روزی روٹی کھو رہے ہیں کیونکہ وولر جھیل کے انتظامی حکام جھیل کے تحفظ کے لئے خاطر خواہ اقدامات نہیں کر رہے ہیں اور تقریباً60 فیصد ماہی گیر پہلے ہی اپنی روایتی روزی روٹی کھو چکے ہیں۔ انہوں نے کہا کہ جیسے جیسے گلوبلائزڈ مارکیٹیں دور دراز کے دیہاتوں تک پہنچ رہی ہیں، اور آس پاس رہنے والے لوگ کیمیکل پھینک کر جھیلوں کو آلودہ کر رہے ہیں، جیسے کہ برتن دھونے والے مائعات، صابن، پولی تھین، پلاسٹک، صفائی کاسامان اور یہاں تک کہ کوڑا کرکٹ بھی جھیلوںمیں ڈال دیاجاتاہے ۔ارشاد رسول کار نے کہا کہ مجموعی طور پر ولر جھیل میں مچھلیوں کی آبادی میں بے قابو انسانی سرگرمیوں کی وجہ سے شدید کمی آئی ہے۔یہاں خود کارصفائی کا نظام ہونا چاہیے، لیکن آلودگی کا بوجھ بہت زیادہ ہے، جو ان سینکڑوں ماہی گیروں کے لئے انتہائی پریشانی کا باعث ہے، جن کا ذریعہ معاش صرف ماہی گیری ہے۔ نیشنل کانفرنس لیڈر نے کہا کہ آج بہت سے ماہی گیروں کو دستی مزدوری یا شہروں میں سبزیاں بیچ کر آمدنی کے متبادل ذرائع تلاش کرنا پڑ رہے ہیں۔انہوں نے کہا کہ جھیل کے آس پاس رہنے والے لوگ اپنے گھر والوں کی کفالت کے لیے زیادہ پریشان ہیں۔ارشاد رسول کار نے کہا کہ جموں و کشمیر کے لیے پیدا کی جانے والی مچھلیوں میں سے 60فیصد جھیل ولر سے آتی تھیں لیکن اب یہاں مچھلیوں کی آبادی میں تیزی سے کمی اور تقریباً 60 فیصد مچھلیوں کی آبادی میںکمی کے باعث ماہی گیر تیزی سے اپنی آمدنی کے ذرائع سے محروم ہو رہے ہیں۔انہوں نے مزید کہا کہ غربت اور پسماندگی وولر جھیل کے آس پاس رہنے والی نصف سے زیادہ آبادی کو متاثر کرتی ہے جو کہ ان تمام لوگوں کے لیے تشویش کا باعث ہے اور ہونا چاہیے جو معاملات کے دائرے میں ہیں۔
