سی ڈی ایس جنرل انیل چوھان کا خطاب، اصلاحات اور جدیدیت پر زور
سرینگر/وی او آئی//چیف آف ڈیفنس اسٹاف جنرل انیل چوھان نے کہا ہے کہ جنگ اور جنگی طریقے ایک بڑے انقلاب کے دہانے پر ہیں اور بھارتی دفاعی افواج بدلتے حالات کے مطابق خود کو ڈھالنے اور اصلاحات اپنانے کے لیے پرعزم ہیں تاکہ ہمیشہ تیار اور مؤثر رہ سکیں۔ وہ ایئر فورس اکیڈمی ڈنڈیگل میں 216ویں کورس کی مشترکہ گریجویشن پریڈ سے خطاب کر رہے تھے۔ جنرل چوھان نے کہا کہ بھارت کی طاقت مضبوط اداروں، جمہوری استحکام اور مسلح افواج کی پیشہ ورانہ صلاحیتوں پر قائم ہے۔ انہوں نے بتایا کہ آپریشن سندور جاری ہے اور نئے افسران ایک ایسے دور میں ایئر فورس میں شامل ہو رہے ہیں جو ہمہ وقت آپریشنل تیاری سے عبارت ہے۔ انہوں نے کہا کہ بھارتی مسلح افواج اس وقت گہرے تبدیلی کے مرحلے سے گزر رہی ہیں، جہاں مربوط ڈھانچے، مشترکہ آپریشنز اور دفاع میں آتم نربھر بھارت کا تصور مستقبل کی طاقت کو تشکیل دے رہا ہے۔ جنرل چوھان نے “جے ہند” کے تصور کو واضح کرتے ہوئے کہا کہ “جے” مشترکہ قوت، “اے” آتم نربھر بھارت اور “آئی” جدت کی علامت ہے۔ انہوں نے مزید کہا کہ پرانے میدانوں میں جنگ ہمیشہ سخت اور خونریز رہے گی، لیکن نئے میدانوں میں جنگ ذہانت، جدت اور پہل سے تیز اور مؤثر ہوگی۔ جو قوت نئے محاذوں پر عبور حاصل کرے گی، وہی مستقبل کی لڑائیوں میں کامیاب ہوگی۔
