سرکار متاثرین کی مستقبل بحالی کیلئے اقدامات اُٹھائے گی ۔ وزیر اعلیٰ عمر عبداللہ
سرینگر//جموں و کشمیر کے وزیر اعلیٰ عمر عبداللہ نے بدھ کے روز کہا کہ شہر سرینگر کے رعناواری علاقے میں آتشزدگی کے واقعے کے متاثرین کو امداد فراہم کرنے کے لیے فوری کارروائی کی گئی ہے۔عمر عبداللہ نے ایک فیس بک پوسٹ میں کہاکہ میں نے اپنے کابینہ کے ساتھی ستیش شرما جی، اپنے مشیر ناصر اسلم وانی سوگامی اور ایم ایل اے جڈی بل تنویر صادق کو آبی گورپورہ کا دورہ کرنے کے لیے تفویض کیا، جہاں خوفناک آگ نے متعدد گھر تباہ اور 26 خاندانوں کو بے گھر کردیا۔عبداللہ نے ایک فیس بک پوسٹ میں کہاکہ دورے کے بعد، اس بات کو یقینی بنانے کے لیے فوری کارروائی کی گئی کہ متاثرہ خاندانوں کو منگل کو 20,000 روپے کی نقد امداد دی جائے۔انہوں نے کہاکہ اس کے علاوہ، ریاستی ڈیزاسٹر رسپانس فنڈ کے ذریعے، ہر گھر کو 1.30 لاکھ روپے کے ساتھ ساتھ خیمے، برتن، کمبل اور دیگر ضروری اشیاء ملیں گی۔وزیراعلیٰ نے کہا کہ ہر خاندان کو آج شام تک چیف منسٹر ریلیف فنڈ سے ایک لاکھ روپے کے ساتھ ساتھ تین ماہ کا راشن، چولہے اور گیس سلنڈر بھی ملیں گے۔ایم ایل اے تنویر صادق متاثرین کی مدد کے لیے اپنے حلقہ بندی ترقیاتی فنڈ (CDF) سے بھی مدد فراہم کریں گے۔ ایک ساتھ مل کر، ہم اس مشکل وقت میں ضرورت مندوں کو فوری اور جامع مدد فراہم کرنے کے لیے پرعزم ہیں۔ادھرمتاثرہ علاقے کے دورے کے بعد صحافیوں سے گفتگو کرتے ہوئے وزیر اعلیٰ کے مشیر نے کہا کہ آگ میں گھر مکمل طور پر جل کر خاکستر ہو چکے ہیں اور حکومت کی کوشش ہو گی کہ موسم سرما کے آغاز سے قبل متاثرین کو پناہ دی جائے۔انہوںنے کہاکہ ڈل جھیل کے باشندوں کی بحالی کے لیے پہلے سے ہی ایک پالیسی موجود ہے۔ ان خاندانوں کو اصولوں کے مطابق دوسری جگہوں پر زمین فراہم کی جا سکتی ہے جہاں وہ اپنے گھر بنا سکتے ہیں۔
