سرینگر//وزیر اعلیٰ عمر عبداللہ نے پی ڈی پی لیڈر وحیدہ پر ہ کی جانب سے دفعہ 370پرپیش کردہ قراردات کو محض ’’پبلسٹی اسٹنٹ‘‘ قراردیتے ہوئے کہاکہ اگر وہ اس معاملے میں سنجیدہ ہوتے تو اس بارے میں پہلے نیشنل کانفرنس کے ساتھ بات کی گئی ہوتی ۔ وائس آف انڈیا کے مطابق جموں و کشمیر کے وزیر اعلیٰ عمر عبداللہ نے آرٹیکل 370 پر پی ڈی پی کے وحید الرحمان پرہ کی طرف سے پیش کردہ قرارداد پر ردعمل ظاہر کرتے ہوئے کہا ہے کہ جموں و کشمیر کے لوگ 5 اگست 2019 کو کیے گئے فیصلے کو منظور نہیں کرتے ہیں۔انہوں نے زور دے کر کہا کہ اگر عوام فیصلے کی حمایت کرتے تو موجودہ نتائج مختلف ہوتے۔ انہوں نے یہ بھی کہا کہ قرارداد کی کوئی اہمیت نہیں ہے اور یہ محض ایک پبلسٹی سٹنٹ ہے۔عمر عبداللہ نے کہا کہ ایوان کی بحث اور اس معاملے پر غور و فکر کسی ایک رکن کی طرف سے نہیں کیا جائے گا۔انہوں نے قرار داد کے مقصد پر سوال اٹھاتے ہوئے تجویز کیا کہ اگر یہ حقیقی ہوتی تو تجویز کنندگان پہلے ہی ان (NC) کے ساتھ بات چیت میں مصروف ہوتے۔عمر عبداللہ کا جواب پرہ کی جانب سے آرٹیکل 370 کی بحالی کے لیے ایک قرارداد پیش کرنے کے بعد آیا ہے، جس کی قانون ساز اسمبلی میں بی جے پی کے اراکین نے شدید مخالفت کی تھی۔
