سرینگر/ شری یدوگیری یتھیراجا مٹھ کے تقدس مآب شری شری یدوگیری یتھیراجا نارائنا رامانوجا جیار سوامی جی نے آج راج بھون میں لفٹینٹ گورنر منوج سنہا سے ملاقات کی ۔ لفٹینٹ گورنر نے عوامی فلاح و بہبود کیلئے ان کی اہم شراکت کیلئے شکریہ کا اظہار کیا اور جموں و کشمیر یو ٹی کے لوگوں کی امن اور خوشحالی کیلئے ان سے دعائیں مانگیں ۔ قبل ازیں رُکن پارلیمنٹ مسٹر حسنین مسعودی نے بھی لفٹینٹ گورنر سے ملاقات کی اور ان سے جموں و کشمیر کی ترقی اور لوگوں کی فلاح و بہبود کے علاوہ دیگر امور پر بھی تبادلہ خیال کیا ۔ انہوں نے کشمیر یونیورسٹی ے ساؤتھ کیمپس کو مختلف تعلیمی شعبوں میں تحقیق اور ترقی کی مزید راہیں کھولنے اور کیمپس کو تحقیقی اور علمی سرگرمیوں میں عمدگی کی نئی بلندیوں تک لے جانے کے حوالے سے تجاویز بھی دیں۔ لفٹینٹ گورنر نے ممبر پارلیمنٹ کو یقین دلایا کہ مختلف مسائل پر ان کی قیمتی بصیرت اور تجاویز کو متعلقہ لوگوں کے ساتھ عمل میں لانے کیلئے اٹھایا جائے گا ۔
