sakeena itoo

صحت عامہ کے شعبے میں موجود کئی خلا کو پر کرنے میںٹیکنالوجی کا اہم رول

ڈیجیٹلائزیشن کے باعث سرکاری نظام میں شفافیت اور جوابدہی کو مزید مضبوط بنانے کے امکانات پیدا / سکینہ ایتو

سرینگر / این این بی // جدید اور ابھرتی ہوئی ٹیکنالوجی صحت کے شعبے میں خدمات کی فراہمی کے نظام کو نمایاں طور پر بہتر بنانے کے ساتھ ساتھ مختلف بیماریوں کی ابتدائی مرحلے میں تشخیص اور مریضوں کو بروقت طبی امداد کی فراہمی یقینی بنانے میں اہم کردار ادا کرسکتی ہے کی بات کرتے ہوئے وزیر صحت و طبی تعلیم سکینہ ایتو نے کہا کہ ڈیجیٹل نظام نے سرکاری امور خصوصاً فائلوں کی نقل و حرکت اور ان کی موجودہ حیثیت کے بارے میں معلومات حاصل کرنا آسان بنا دیا ہے۔نیشنل نیوز بیورو ( این این بی ) کے مطابق اسلامک یونیورسٹی آف سائنس اینڈ ٹیکنالوجی اونتی پورہ میں منعقدہ دو روزہ قومی کانفرنس کے موقع پر میڈیا سے بات کرتے ہوئے وزیر صحت و طبی تعلیم سکینہ ایتو نے کہا کہ ٹیکنالوجی کے مو ¿ثر استعمال سے صحت عامہ کے شعبے میں موجود کئی خلا کو پ ±ر کیا جاسکتا ہے، بالخصوص دور دراز اور پسماندہ علاقوں میں رہنے والے لوگوں کو بروقت طبی سہولیات فراہم کرنے میں جدید ٹیکنالوجی انتہائی مددگار ثابت ہوسکتی ہے۔انہوں نے کہا کہ ٹیکنالوجی کی مدد سے ایسے مریضوں کی بروقت نشاندہی کی جاسکتی ہے جنہیں فوری طبی امداد کی ضرورت ہو، جس کے بعد انہیں قریبی طبی مرکز تک پہنچانے کے لیے ایمبولینس سمیت دیگر سہولیات فوری طور پر فراہم کی جاسکتی ہیں۔وزیر صحت نے مثال دیتے ہوئے کہا کہ اگر کسی دور افتادہ علاقے میں حاملہ خاتون کو فوری طور پر ایمبولینس کی ضرورت پیش آتی ہے تو جدید ٹیکنالوجی کے ذریعے اس کی درخواست اور مقام کی بروقت نشاندہی کرکے ایمبولینس سروس کو فوری طور پر متحرک کیا جاسکتا ہے۔انہوں نے کہا کہ اس طرح کی ٹیکنالوجی سے نہ صرف صحت کے شعبے بلکہ تعلیم اور حکومت کے دیگر محکموں میں بھی عام لوگوں کو بہتر اور تیز رفتار خدمات فراہم کرنے میں مدد مل سکتی ہے۔ایتو نے کہا کہ ٹیکنالوجی کے استعمال سے متعدد انتظامی امور میں انسانی افرادی قوت پر انحصار بھی کم کیا جاسکتا ہے، جبکہ سرکاری خدمات کی فراہمی میں شفافیت، رفتار اور کارکردگی کو بہتر بنایا جاسکتا ہے۔وزیر صحت نے طبی سائنس میں ہونے والی تیز رفتار پیش رفت کا ذکر کرتے ہوئے امید ظاہر کی کہ جدید ٹیکنالوجی اور طبی شعبے میں ہونے والی نئی ایجادات کے ذریعے کینسر جیسی سنگین بیماریوں کی ابتدائی مرحلے میں تشخیص ممکن ہوسکے گی۔انہوں نے کہا کہ اگر بیماری کی بروقت تشخیص ہوجائے تو مریض کو مناسب علاج فراہم کرنے کے امکانات بھی بڑھ جاتے ہیں اور اس سے علاج کے نتائج بہتر بنانے میں مدد مل سکتی ہے۔ایتو نے حکمرانی میں جوابدہی اور شفافیت کی اہمیت پر بھی زور دیا۔ انہوں نے کہا کہ ڈیجیٹل نظام نے سرکاری امور خصوصاً فائلوں کی نقل و حرکت اور ان کی موجودہ حیثیت کے بارے میں معلومات حاصل کرنا آسان بنا دیا ہے۔انہوں نے کہا کہ اب لوگ یہ معلوم کرسکتے ہیں کہ ان کی فائل کس افسر یا کس مرحلے پر زیر کارروائی ہے، جو ٹیکنالوجی کے فوائد کی ایک نمایاں مثال ہے۔وزیر صحت نے کہا کہ ڈیجیٹلائزیشن کے باعث سرکاری نظام میں شفافیت اور جوابدہی کو مزید مضبوط بنانے کے امکانات پیدا ہوئے ہیں۔ایک الگ معاملے پر بات کرتے ہوئے سکینہ ایتو نے حالیہ واقعے پر تشویش کا اظہار کیا اور بی جے پی رکن اسمبلی شگن پریہار کی جانب سے مسلمانوں کے بارے میں مبینہ طور پر دیے گئے بیان پر تنقید کی۔انہوں نے کہا کہ جموں و کشمیر میں لوگ طویل عرصے سے تنازعات اور مشکلات سے گزر رہے ہیں، اس لیے سیاسی نمائندوں کو عوامی سطح پر بیانات دیتے وقت زیادہ احتیاط اور تحمل کا مظاہرہ کرنا چاہیے۔ایتو نے کہا کہ وہ حالیہ واقعے پر، اس میں ملوث کسی بھی فریق سے قطع نظر، افسردہ اور فکرمند ہیں اور ایسے واقعات نہیں ہونے چاہئیں۔انہوں نے الزام عائد کیا کہ بی جے پی رکن اسمبلی شگن پریہار نے مسلمانوں کے بارے میں نامناسب زبان استعمال کی، جس پر انہیں معذرت کرنی چاہیے۔انہوں نے کہا کہ بی جے پی کو بھی اپنے اراکین اسمبلی کے بیانات پر نظر رکھنی چاہیے اور انہیں ان کے بیانات کے لیے جوابدہ بنانا چاہیے۔وزیر صحت نے مطالبہ کیا کہ متعلقہ رکن اسمبلی بالخصوص جموں و کشمیر کے مسلمانوں سے معذرت کریں۔انہوں نے کہا کہ سیاسی رہنماو ¿ں اور عوامی نمائندوں کی ذمہ داری ہے کہ وہ حساس معاملات پر گفتگو کرتے ہوئے سماجی ہم آہنگی، امن اور باہمی احترام کو مقدم رکھیں۔