اہربل اور منز گام علاقوں میں نئے سڑک پروجیکٹوں کا بھی افتتاح کیا
کلگام//وزیر برائے تعلیم ، سماجی بہبود ، صحت اور طبی تعلیم محترمہ سکینہ ایتو نے کلگام ضلع کا دورہ کیا اور کھیلوں ، صحت کی دیکھ بھال اور سڑکوں کی رابطہ کاری کے بنیادی ڈھانچے کو مضبوط بنانے کے مقصد سے مختلف پروگراموں اور افتتاحی و بنیاد رکھنے کی تقریبات میں شرکت کی ۔ ابتداء میں وزیر نے ایل این کے شری نذیر احمد وانی گورنمنٹ بوائیز ہائیر سکینڈری اسکول کلگام میں انڈر 19 لڑکیوں کے بیس بال انٹر ڈسٹرکٹ ٹورنامنٹ کا افتتاح کیا ۔ یہ ٹورنامنٹ یوتھ سروسز اینڈ سپورٹس ڈیپارٹمنٹ کلگام کی میز بانی میں منعقد ہو رہا ہے جس میں کشمیر ڈویژن کے تمام اضلاع کی ٹیمیں شرکت کر رہی ہیں ۔ وزیر موصوفہ نے گندوانی میں ہیلتھ سب سنٹر کی تعمیر کیلئے بنیاد رکھی جس کی تخمینہ لاگت 40.00 لاکھ روپے ہے ۔ وزیر موصوفہ نے366.81 لاکھ روپے کی تخمینہ لاگت سے چیچملا ۔ اہربل سڑک سے لون پورہ تک سڑک کی تعمیر و دیکھ بھال ، 30.00 لاکھ روپے کی تخمینہ لاگت سے خوری بٹا پورہ آئی ٹی آئی سے شیخ ناگن تک سڑک کی تعمیر ، 18.00 لاکھ روپے کی تخمینہ لاگت سے اہر بل مین روڈ سے چندر منزگام ۔ اے تک سڑک کی تعمیر اور 15.00 لاکھ روپے کی تخمینہ لاگت سے بشیر مرزا کے گھر سے گوجر بستی کاوٹقری تک سڑک کی تعمیر کیلئے بھی باضابطہ طور پر بنیاد رکھیں ۔ ان منصوبوں کا مقصد ضلع کے ملحقہ علاقوں میں سڑک رابطوں کو بہتر بنانا ، آمدورفت کو آسان کرنا اور لوگوں کی نقل و حرکت کو ہموار بنانا ہے ۔ محترمہ سکینہ ایتو نے لوگوں سے بات چیت کی اور ان سے عوامی فلاح و بہبود کے مسائل اور حکومت کی توسیع شدہ خدمات کی فراہمی کے بارے میں پوچھا ۔ انہوں نے عمل درآمد کرنے والی ایجنسیوں پر زور دیا کہ افتتاح شدہ منصوبوں کو مقررہ معیاری پیرا میٹرز کے مطابق تیار کریں اور شعبہ جاتی و ضلعی سربراہوں کو ہدایت دی کہ کاموں کی باقاعدگی سے نگرانی کریں اور بروقت تکمیل کو یقینی بنائیں ۔ وزیر کے ہمراہ ڈسٹرکٹ پروگرام آفیسر آئی سی ڈی ایس کلگام ، ایس ڈی ایم ڈی ایچ پورہ ، اسسٹنٹ کمشنر ڈیولپمنٹ کلگام ، چیف میڈیکل آفیسر ، چیف ایجوکیشن آفیسر ، پی ڈی ڈی ، جل شکتی ، اری گیشن اینڈ فلڈ کنٹرول کلگام کے ایگزیکٹو انجینئرز کے علاوہ دیگر افسران بھی تھے ۔
