عوامی تحفظ کے پیش نظر جموں میونسپل کارپوریشن کی کارروائیاں
سرینگر//یو این ایس / عوامی تحفظ کے پیش نظر جموں میونسپل کارپوریشن نے شہر بھر میں خستہ حال، خطرناک اور ساختی اعتبار سے غیر محفوظ عمارتوں کی نشاندہی اور معائنہ کرنے کے لیے خصوصی مہم شروع کی ہے۔ اس مہم کے تحت پرانے شہر کے علاقوں اور ایسی ادارہ جاتی عمارتوں پر خصوصی توجہ دی جائے گی جہاں بڑی تعداد میں لوگ رہتے یا روزانہ جمع ہوتے ہیں۔جموں میونسپل کارپوریشن کے کمشنر دیوانش یادو نے بتایا کہ گزشتہ کچھ عرصے سے پرانے شہر میں پرانی اور غیر محفوظ عمارتوں سے متعلق شکایات موصول ہو رہی تھیں اور برسات کے موسم میں ان عمارتوں سے وابستہ خطرات مزید بڑھ جاتے ہیں۔انہوں نے کہا کہ گزشتہ ایک سال کے دوران کارپوریشن نے تقریباً 15 ایسی عمارتوں کی نشاندہی کی جنہیں غیر محفوظ قرار دیا گیا اور بعد ازاں انہیں منہدم کر دیا گیا۔ اب نئی مہم کے تحت وارڈ سطح پر مشترکہ ٹیمیں تشکیل دی گئی ہیں، جن میں انجینئرز اور نفاذی افسران شامل ہیں۔ یہ ٹیمیں ممکنہ طور پر خطرناک عمارتوں کا موقع پر جاکر معائنہ کریں گی۔کمشنر کے مطابق تمام ٹیموں کو 15 دن کے اندر اپنی تفصیلی رپورٹ پیش کرنے کی ہدایت دی گئی ہے۔ معائنے کے دوران عمارتوں کے ڈھانچے میں موجود خامیوں، ستونوں اور بنیادوں کی حالت، پانی کے رساو ¿، شدید خستگی اور زمین کھسکنے سے متعلق ممکنہ خطرات کا جائزہ لیا جائے گا۔رپورٹ میں عمارت کا مقام، مالکیت، موجودہ حالت، عمارت سے لاحق خطرے کی نوعیت اور آئندہ کارروائی سے متعلق سفارشات شامل ہوں گی۔ ادارہ جاتی عمارتوں پر خصوصی توجہ دی جائے گی کیونکہ ان میں کسی بھی ساختی خرابی کی صورت میں بڑی تعداد میں افراد متاثر ہو سکتے ہیں۔رہائشی عمارتوں کے معاملے میں 50 سال یا اس سے زیادہ پرانی عمارتوں، خصوصاً ایسی عمارتوں جو نمایاں طور پر خستہ حال ہو چکی ہیں، کو بھی معائنے کے دائرے میں لایا جائے گا۔ دیوانش یادو نے کہا کہ ٹیموں میں انجینئرز کی شمولیت کے باعث عمارتوں کا موقع پر ہی تکنیکی معائنہ کیا جائے گا اور رپورٹ بھی موقع پر تیار کی جائے گی۔انہوں نے واضح کیا کہ ہر غیر محفوظ عمارت کو لازماً منہدم نہیں کیا جائے گا۔ کارپوریشن سے وابستہ ساختی انجینئرز یہ بھی جائزہ لیں گے کہ آیا کسی عمارت کو مرمت، مضبوطی یا ساختی بہتری کے ذریعے محفوظ بنایا جا سکتا ہے یا نہیں۔وارڈ سطح پر موصول ہونے والی معائنہ رپورٹس کی بنیاد پر ایسی عمارتوں کو ترجیح دی جائے گی جن میں فوری کارروائی کی ضرورت ہو۔ ان کے خلاف میونسپل کارپوریشن ایکٹ کی متعلقہ دفعات کے تحت ضروری اقدامات کیے جائیں گے۔ سڑکوں میں گڑھوں کی نشاندہی کے لیے مصنوعی ذہانت کا استعمالعمارتوں کی حفاظت کے ساتھ ساتھ جموں میونسپل کارپوریشن نے شہری بنیادی ڈھانچے کے مسائل کی نشاندہی کے لیے مصنوعی ذہانت پر مبنی نظام بھی متعارف کرایا ہے۔ اس نظام کے ذریعے سڑکوں پر گڑھوں اور دیگر شہری مسائل کی نشاندہی کی جائے گی۔کمشنر نے بتایا کہ برسات کے بعد سڑکوں میں گڑھے ایک بڑا مسئلہ بن جاتے ہیں، جبکہ روایتی طریقہ کار میں منصوبوں کی منظوری اور ٹینڈرنگ کے عمل میں کافی وقت لگ سکتا ہے۔نئے نظام کے تحت جموں میونسپل کارپوریشن کی کچرا اٹھانے والی گاڑیوں پر نصب کیمروں کے ذریعے شہر کی سڑکوں کی مسلسل نگرانی کی جائے گی۔ یہ ٹیکنالوجی سڑکوں پر موجود گڑھوں کے علاوہ سڑک کنارے کچرے کے ڈھیر، گرے ہوئے بجلی کے کھمبوں اور دیگر شہری مسائل کی بھی نشاندہی کر سکے گی۔نشاندہی کیے گئے مقامات کی فہرست تیار کرکے متعلقہ فیلڈ ٹیموں کو فراہم کی جائے گی، جو موقع پر پہنچ کر ضروری مرمت اور دیگر اقدامات کریں گی۔ کمشنر کے مطابق اس نظام کا مقصد شہری مسائل کو بروقت حل کرنا اور انہیں حادثات یا عوام کے لیے طویل عرصے تک پریشانی کا باعث بننے سے پہلے دور کرنا ہے۔
