پٹنہ /ایجنسیز // بہار کے نوادہ ضلع کے روہ تھانہ علاقے کے تحت پرانی بازار میں ہفتہ کی رات رام نومی جلوس کے موقع پر کچھ شرپسند عناصر کے درمیان جھڑپ ہوگئی جس نے دیکھتے ہی دیکھتے بڑے تنازعہ کی شکل اختیار کرلی۔ اس دوران کچھ لوگوں کی طرف سے پتھربازی شروع کردی گئی جس سے علاقہ میں کشیدگی پھیل گئی۔ واردات کے بعد علاقے میں بھاری پولیس نفری تعینات کردی گئی ہے۔اطلاعات کے مطابق ہفتہ کی رات روہ کے بلاک ہیڈ کوارٹر میں رام نومی کے موقع پر جلوس نکالا جا رہا تھا۔ اس دوران جلوس کا راستہ نچلی بازار سے درگا استھان تک تھا۔ جب جلوس بازار سے گزر رہا تھا تبھی جامع مسجد کے قریب ایک گلی سے شرپسند عناصر نے جلوس پر پتھراؤ کردیا جس سے افراتفری مچ گئی وہاں پر موجود تھانہ انچارج راہول ابھیشیک نے صورتحال پر قابو پانے کی کوشش کی لیکن حالات بے قابو ہوگئے تا ہم کچھ دیر بعد حالات پرسکون ہو گئے۔ اس کے بعد پولیس اہلکار وہاں سے جلوس کو آگے بڑھادیا۔ اسی دوران ایک بار پھر پتھراؤ ہونے لگا جس کی وجہ سے جلوس میں شامل کچھ لوگ زخمی ہوگئے۔ انہیں فوری طور پر روہ کے پرائمری ہیلتھ سینٹر لے جایا گیا اور ابتدائی طبی امداد کے بعد وہاں سے چھٹی دے دی گئی۔اس کے بعد دیکھتے ہی دیکھتے کچھ شرپسندوں نے سڑک کے کنارے لگے ایک ٹھیلے میں آگ لگا دی جس سے صورتحال مزید خراب ہوگئی۔ تاہم پولیس نے فوری جوابی کارروائی کرتے ہوئے فائر بریگیڈ کو بلایا جس نے موقع پر پہنچ کر آگ پر قابو پالیا۔واقعہ میں ملوث سماج دشمن عناصر کی شناخت کیلئے سی سی ٹی وی فوٹیج اور دیگر دستیاب ویڈیو شواہد کی جانچ کی جا رہی ہے۔ انتظامیہ نے واضح کیا ہے کہ شرپسندوں کو کسی صورت بخشا نہیں جائے گا اور ان کے خلاف سخت کارروائی کی جائے گی۔ فی الحال علاقے میں حالات معمول پر بتائے جا رہے ہیں تاہم احتیاط کے طور پر جائے وقوعہ پر اضافی پولیس فورس تعینات کر دی گئی ہے۔ انتظامیہ عوام سے امن برقرار رکھنے اور افواہوں پر توجہ نہ دینے کی اپیل کر رہی ہے۔
