پریاگ راج میں نس بندی کے دوران خاتون کی موت

پریاگ راج/یو این آئی// اتر پردیش کے پریاگ راج ضلع کے نینی تھانہ علاقے میں جمعہ کے روز نس بندی کے دوران ایک خاتون کی موت کے بعد اہل خانہ نے زبردست ہنگامہ کیا۔ پولیس کے مطابق منڈی چک کی رہنے والی روشنی (28) جمعہ کی صبح اپنے شوہر پرویش کے ساتھ نس بندی کرانے چاکا سی ایچ سی پہنچی تھیں۔ یہاں لگے کیمپ میں شام تقریباً چار بجے سرجن ڈاکٹر پرتِما مشرا اور ڈاکٹر آشتوش نے ان کا آپریشن کیا۔ آپریشن کے دوران ہی ان کی طبیعت بگڑ گئی۔ خاتون کو تشویشناک حالت میں سوروپ رانی نہرو اسپتال ریفر کیا گیا۔ اہل خانہ کے مطابق انہیں ایس آر این اسپتال لے جانے کے بجائے جیون جیوتی اسپتال لے جایا گیا، جہاں علاج کے دوران جمعہ کی دیر شام روشنی نے دم توڑ دیا۔ موت کی اطلاع ملتے ہی مشتعل اہل خانہ لاش لے کر چاکا سی ایچ سی پہنچ گئے ۔ خواتین نے تقریباً 50 میٹر تک لاش کو اٹھا کر سڑک تک پہنچایا اور احتجاج کرکے راستہ جام کر دیا۔ اس دوران ایمبولینس عملے کے ساتھ ہاتھا پائی اور شدید ہنگامہ بھی ہوا۔ سڑک پر رکاوٹیں لگا کر آمد و رفت روک دی گئی، جس سے طویل جام لگ گیا۔ اطلاع ملنے پر نینی انسپکٹر اور بعد میں اسسٹنٹ ڈپٹی کمشنر آف پولیس کرچھنا سنیل کمار سنگھ پولیس فورس کے ساتھ موقع پر پہنچ گئے ۔ انتظامیہ کے افسران اور پولیس نے تقریباً چار گھنٹے تک اہل خانہ کو سمجھانے کی کوشش کی۔ اہل خانہ نے متعلقہ ڈاکٹر کے خلاف معاملہ درج کر کے گرفتاری اور 50 لاکھ روپے معاوضے کا مطالبہ کیا۔ بعد میں چیف میڈیکل آفیسر ڈاکٹر اے کے تیواری اور تحصیلدار کی مداخلت کے بعد اہل خانہ چار لاکھ روپے معاوضے پر راضی ہو گئے ۔ انتظامیہ کی جانب سے چار لاکھ روپے کی مالی امداد، پردھان منتری آواس یوجنا کے تحت مکان اور بچوں کی پرورش کے لیے حکومت کو تجویز بھیجنے کی یقین دہانی کرائی گئی۔