بڑودہ/.یو این آئی//گجرات کے آنند ضلع میں اڈس گاؤں کے پاس ایک زیرِ تعمیر ریلوے اوور برج (فلائی اوور) کا ایک حصہ گر گیا، تاہم خوش قسمتی سے اس حادثے میں کوئی جانی نقصان نہیں ہوا۔یہ واقعہ ہفتہ کی شام ساڑھے سات بجے ویسٹرن ریلوے کے وڈودرا ریلوے ڈویژن کے تحت آنے والے وڈود اسٹیشن کے قریب پیش آیا۔ ویسٹرن ریلوے کے پبلک ریلیشنز آفیسر (پی آر او) انوبھو سکسینہ نے اتوار کے روز بتایا کہ یہ حادثہ وڈود اسٹیشن کے پاس لیول کراسنگ (ایل سی) گیٹ نمبر 250 کے پاس ہوا ہے ۔ واضح رہے کہ لیول کراسنگ وہ جگہ ہوتی ہے جہاں سڑک اور ریلوے ٹریک ایک ہی سطح پر ایک دوسرے کو کاٹتے ہیں۔انہوں نے بتایا کہ یہ روڈ اوور برج (آر او بی) ابھی زیرِ تعمیر ہے ۔ انہوں نے کہا، “عوام کے تحفظ کو مزید بہتر بنانے کیلئے ایل سی گیٹ کی جگہ اس آر او بی کی تعمیر کی جا رہی ہے ۔ کل شام تقریباً 7:30 بجے تعمیراتی کام کے دوران ایک اسٹرکچرل خرابی (ڈھانچے کی خامی) پیدا ہوئی۔ وہاں تین گرڈرز (بیم) نصب تھے ، جن میں سے ایک اپروچ گرڈر فیل ہو گیا اور اس کی وجہ سے تینوں گرڈرز نیچے گر گئے ۔
