کسی بھی شکل میں دہشت گردی کی لعنت کا کوئی جواز نہیں

خطرات سے نظریں ہٹانا سلامتی کے مفادات کیلئے نقصان دہ ہوگا: وزیر خارجہ ایس جے شنکر

سری نگر//گوامیں جاری شنگھائی تعاون تنظیم (SCO) کے وزرائے خارجہ کے اجلاس سے خطاب کرتے ہوئے وزیر خارجہ ایس جے شنکر نے اپنے پاکستانی ہم منصب بلاول بھٹو زرداری کی موجودگی میں جمعہ کوکہاکہ دہشت گردانہ سرگرمیوں کیلئے مالیاتی چینل کو بلا تفریق بلاک کیا جانا چاہیے اور سرحد پار دہشت گردی سمیت تمام شکلوں میں دہشت گردی کو روکنا چاہیے۔جے کے این ایس مانٹرینگ ڈیسک کے مطابق شنگھائی تعاون تنظیم کے وزرائے خارجہ کے اجلاس سیپنے خطاب میں، ایس جے شنکر نے کہا کہ دہشت گردی سے نظریں ہٹانا گروپ کے سلامتی کے مفادات کے لیے نقصان دہ ہو گا اور یہ کہ جب دنیا کووڈ19 کی وبا اور اس کے نتائج کا سامنا کرنے میں مصروف ہے، دہشت گردی بلا روک ٹوک جاری رہی۔وزیر خارجہ نے کہا کہ ہندوستان اس بات پر پختہ یقین رکھتا ہے کہ دہشت گردی کا کوئی جواز نہیں ہو سکتا اور کہا کہ اس لعنت کا مقابلہ کرناSCO کے اصل مینڈیٹ میں سے ایک ہے۔انہوں نے کہا کہ ہمیں کسی بھی فرد یا ریاست کو غیر ریاستی عناصر کے پیچھے چھپنے کی اجازت نہیں دینی چاہیے۔ایس جے شنکر نے اس بات پر بھی زور دیا کہ جہاں رابطہ ترقی کی کلید ہے، وہیں تمام رکن ممالک کی خودمختاری اور علاقائی سالمیت کا احترام کیاجانا چاہیے۔اس بیچ ریزورٹ کے ایک لگڑری ہوٹل میں ہونے والی میٹنگ میں چین کے وزیر خارجہ کن گینگ، روس کے سرگئی لاوروف اور ایس سی او کے دیگر رکن ممالک کے ان کے ہم منصبوں نے شرکت کی۔ وزیر خارجہ ایس جے شنکر نے افغانستان کی صورتحال اور کووڈ19 وباء کے اثرات کے ساتھ ساتھ جغرافیائی سیاسی ہلچل کے نتائج پر بھی روشنی ڈالی جس نے توانائی، خوراک اور کھاد کی سپلائی کو متاثر کیا۔انہوںنے کہاکہ اس خطرے سے نظریں ہٹانا ہمارے سلامتی کے مفادات کے لیے نقصان دہ ہوگا۔ انہوںنے کہاکہ ہم پختہ یقین رکھتے ہیں کہ دہشت گردی کا کوئی جواز نہیں ہو سکتا اور اسے اس کی تمام شکلوں اور مظاہر میں روکا جانا چاہیے۔وزیرخارجہ کاکہناتھاکہ دہشت گردانہ سرگرمیوں کے لیے مالی اعانت کے چینل کو بلا تفریق ضبط اور بلاک کیا جانا چاہیے۔انہوںنے کہاکہ رکن ممالک کو یہ یاد دلانے کی ضرورت نہیں ہے کہ دہشت گردی کا مقابلہ کرناSCO کے اصل مینڈیٹ میں سے ایک ہے۔افغانستان کے بارے میں، انہوں نے کہا کہ اس ملک میں ابھرتی ہوئی صورتحال ہماری توجہ کا مرکزہے۔انہوںنے کہاکہ ہماری کوششوں کا رخ افغان عوام کی فلاح و بہبود کے لیے ہونا چاہیے۔ ہماری فوری ترجیحات میں انسانی امداد کی فراہمی، ایک حقیقی جامع اور نمائندہ حکومت کو یقینی بنانا، دہشت گردی اور منشیات کی اسمگلنگ کا مقابلہ کرنا اور خواتین، بچوں اور اقلیتوں کے حقوق کا تحفظ شامل ہے۔اپنے خطاب میں، جے شنکر نے نوٹ کیا کہ دنیا کو درپیش موجودہ بحرانوں نے عالمی اداروں کی بروقت اور مؤثر طریقے سے چیلنجوں سے نمٹنے کی صلاحیت میں ساکھ اور اعتماد کی کمی کو بے نقاب کیا ہے۔ انہوں نے کہا کہ شنگھائی تعاون تنظیم میں اصلاحات اور جدیدیت ایک زیادہ عصری نقطہ نظر میں مدد کرے گی جس کی ہندوستان فعال طور پر حمایت کرے گا۔وزیر خارجہ نے شنگھائی تعاون تنظیم کے مکمل رکن ممالک کے طور پر ایران اور بیلاروس کی شمولیت کے حوالے سے پیش رفت کا بھی ذکر کیا۔انہوں نے یہ بھی کہا کہ انگریزی کو SCO کی تیسری سرکاری زبان بنانے کیلئے تعمیری اقدامات کیے جا رہے ہیں۔ فی الحال، چینی اور روسیSCO کی2سرکاری زبانیں ہیں۔جے شنکر نے اسٹارٹ اپس اور اختراعات اور روایتی ادویات پر دو نئے ورکنگ گروپس بنانے کی ہندوستان کی تجویز کے لیے رکن ممالک کی حمایت کی بھی تعریف کی۔قابل ذکر ہے کہ شنگھائی تعاون تنظیم (SCO)ایک بااثر اقتصادی اور سیکورٹی بلاک ہے اور یہ بین الاقوامی بین الاقوامی تنظیموں میں سے ایک کے طور پر ابھری ہے۔ایس سی او کی بنیاد 2001 میں روس، چین، کرغز جمہوریہ، قازقستان، تاجکستان اور ازبکستان کے صدور نے شنگھائی میں ایک سربراہی اجلاس میں رکھی تھی۔بھارت اور پاکستان 2017 میں اس کے مستقل رکن بنے۔