سری نگر//وزیر برائے تعلیم سکینہ اِیتو نے کہا کہ 52 نئے منظور شدہ ڈِگری کالجوں کو مکمل طور پر فعال بنایا جا رہا ہے اس سے پہلے کہ جموں و کشمیر میں نئے ڈگری کالج کھولنے کی کوئی تجویز پیش کی جائے گی۔وزیرموصوفہ آج ایوان میں اراکین اسمبلی نظام الدین بٹ، ڈاکٹر راجیو کمار بھگت، مظفر اقبال خان، چودھری اکرم اور ڈاکٹر رامیشور سنگھ کے مشترکہ ایک سوال کا جواب دے رہی تھیں۔اُنہوںنے واضح کیا کہ جموں و کشمیر میں ڈِگری کالجوں کی اَپ گریڈیشن کسی بھی سیاسی مداخلت کی بنیاد پر نہیں ہوگی بلکہ یہ عوامی ضروریات کے مطابق ہوگی۔ اُنہوں نے مزید کہا کہ صحت و تعلیمی شعبے کسی بھی معاشرے کی ترقی کی عکاسی کرتے ہیں اور ان شعبوں کو ووٹ بینک کے نقطہ نظر سے نہیں دیکھا جانا چاہیے۔وزیرسکینہ اِیتو نے بتایا کہ منجا کوٹ میں ڈِگری کالج کے قیام کے لئے پہلے ہی سٹیٹ لیول ایمپاورڈ سٹینڈنگ کمیٹی قائم کی گئی تھی تاکہ کالج کے قیام کے لئے موزوں جگہ اورغیر خدماتی علاقوں کی نشاندہی کی جا سکیں۔ اُنہوں نے کہا کہ ایڈمنسٹریٹیوڈیپارٹمنٹ کو پیش کی گئی فزیبلیٹی رپورٹ کے مطابق، کالج کے قیام کے لئے لوئر سرولہ گاؤں میں 72 کنال 15 مرلے، لوئر منگر (نگر) گاؤں میں 9 کنال اور دہری دھارا گاؤں میں تلواڈ میں 56 کنال کسٹیڈی لینڈ دستیاب کی گئی۔اُنہوں نے ڈِگری کالج ارنیا کے قیام کے بارے میں کہا کہ محکمہ اعلیٰ تعلیم مختلف طبقوں بشمول اراکین اسمبلی کی جانب سے موصول ہونے والی درخواستوں کو فزیبلیٹی کے معیار کے مطابق جانچ رہا ہے۔ اُنہوں نے کہا کہ ارنیا میں ڈِگری کالج کھولنے کے فزیبلیٹی رِپورٹ کے مطابق موجودہ جی ڈِی سی آر ایس پورہ اورجی ڈِی سی بشناہ تقریباً 17 کلومیٹر دور ہیں اور علاقے کی تعلیمی ضروریات پوری کرتے ہیں۔ اُنہوں نے کہا کہ ان کے علاوہ جموں ضلع میں 7 ڈگری کالج فعال ہیں ۔نئے ڈگری کالج کے قیام پر غور اس وقت کیا جائے گا جب جی ڈِی سی آر ایس پورہ اور جی ڈِی سی بشناہ میں داخلے اور آپریشنل صلاحیت اپنی حد تک پہنچ جائیں۔
وزیر موصوفہ نے ڈگری کالج لوہائی۔ملہار کے قیام کے حوالے سے بتایا کہ اِس معاملے کا محکمہ میں جائزہ لیا گیا اور کمیٹی کی فزیبلیٹی رپورٹ کی بنیاد پر فیصلہ کیا گیا کہ علاقے کی دوری، جغرافیہ اور قریب ترین ڈگری کالج کی دوری کے پیش نظر لوہائی۔ملہار میں ڈِگری کالج قائم کیا جائے۔اُنہوں نے بانڈی پورہ میں خواتین کے لئے ڈِگری کالج کے قیام کے بارے میں وزیر نے کہا کہ موجودہ گورنمنٹ ڈِگری کالج بانڈی پورہ علاقے کی اعلیٰ تعلیمی ضروریات پوری کر رہا ہے جس میں 497 خواتین اور 530 مرد طلبہ اِندراج ہے۔ اُنہوں نے کہا کہ جی ڈِی سی بانڈی پورہ کے علاوہ ضلع میں مزید 7 ڈِگری کالج فعال ہیں جن میں خواتین اور مرد طلبہ کی تعداد مناسب حد تک متوازن ہے۔وزیر سکینہ اِیتو نے مزید کہا کہ جی ڈِی سی بانڈی پورہ اور ضلع کے دیگر کالجوں میں موجودہ داخلہ نمونوں کے مطابق توجہ معیاری تعلیم کی فراہمی اور علمی اِنفراسٹرکچر کو مضبوط بنانے پر توجہ مرکوز ہے۔اُنہوں نے ڈِگری کالج سرنکوٹ کے لئے زمین کے حوالے سے بتایا کہ تحصیل دار سرنکوٹ نے خواتین کے لئے گورنمنٹ ڈگری کالج سرنکوٹ کے قیام کے لئے کوٹلہ گاؤں میں 66 کنال ریاستی اَراضی کی نشاندہی کی اور یہ زمین پرنسپل گورنمنٹ ڈگری کالج سرنکوٹ کے نام منتقل کر دی گئی ہے۔
