سرینگر// یو این ایس// عالمی یومِ ماحولیات کے موقع پر جموں و کشمیر کے لیفٹیننٹ گورنر منوج سنہااور وزیر اعلیٰ عمر عبداللہ نے ماحولیات کے تحفظ اور قدرتی وسائل کی بقا کے لیے اجتماعی اقدامات کی ضرورت پر زور دیتے ہوئے عوام سے زمین اور فطرت کے تحفظ کے عہد کی تجدید کی اپیل کی ہے۔یو این ایس کے مطابق اپنے خصوصی پیغام میں لیفٹیننٹ گورنر منوج سنہا نے کہا کہ عالمی یومِ ماحولیات ہمیں مادرِ ارض کے تحفظ اور قدرتی توازن کو برقرار رکھنے کی ذمہ داری یاد دلاتا ہے۔ انہوں نے کہا کہ آنے والی نسلوں کو ایک محفوظ، صحت مند اور سرسبز ماحول فراہم کرنے کے لیے مشترکہ کوششیں ناگزیر ہیں۔منوج سنہا نے اپنے پیغام میں کہا، ’’عالمی یومِ ماحولیات کے موقع پر آئیے ہم سب مادرِ ارض کے تحفظ اور فطرت کے نازک توازن کو برقرار رکھنے کے عزم کی تجدید کریں۔ ماحولیات کے تحفظ کے لیے ہماری اجتماعی کاوشیں انسانیت کی فلاح اور مستقبل کی نسلوں کے لیے ایک صحت مند سیارے کی ضمانت ہیں۔‘‘دوسری جانب وزیر اعلیٰ عمر عبداللہ نے بھی عالمی یومِ ماحولیات کے موقع پر اپنے پیغام میں ماحول دوست ترقی اور قدرتی وسائل کے تحفظ کے لیے حکومت کے عزم کا اعادہ کیا۔وزیر اعلیٰ کے دفتر کی جانب سے جاری بیان کے مطابق عمر عبداللہ نے کہا کہ حکومت ماحولیات کے تحفظ اور پائیدار ترقی کے اصولوں پر عمل پیرا ہے اور اس مقصد کے حصول کے لیے ہر شہری کا تعاون انتہائی ضروری ہے۔یو این ایس کے مطابق انہوں نے عوام سے اپیل کی کہ وہ درختوں کے تحفظ، آبی وسائل کی حفاظت، فضائی آلودگی میں کمی اور قدرتی ماحول کی بقا کے لیے اجتماعی مشن کا حصہ بنیں تاکہ آئندہ نسلوں کے لیے ایک بہتر اور محفوظ ماحول یقینی بنایا جا سکے۔وزیر اعلیٰ نے کہا کہ ماحولیاتی چیلنجز سے نمٹنے کے لیے صرف حکومتی اقدامات کافی نہیں بلکہ معاشرے کے ہر طبقے کی فعال شرکت ضروری ہے۔ انہوں نے اس عزم کا اظہار کیا کہ جموں و کشمیر میں پائیدار ترقی کے منصوبوں کو فروغ دیتے ہوئے ماحولیات کے تحفظ کو ترجیح دی جائے گی۔عالمی یومِ ماحولیات ہر سال 5 جون کو دنیا بھر میں منایا جاتا ہے جس کا مقصد ماحولیات کے تحفظ، موسمیاتی تبدیلیوں کے خطرات سے آگاہی اور قدرتی وسائل کے پائیدار استعمال کے حوالے سے شعور بیدار کرنا ہے۔
