اِضافی کار پارکنگ سہولیات کیلئے اَقدامات کا جائزہ لیا
بارہمولہ//ضلع ترقیاتی کمشنر بارہمولہ ڈاکٹر سیّد سحرش اَصغر نے ٹورسٹ ریزورٹ گلمرگ میں آنے والے موسم سرما کے لئے اِضافی پارکنگ سہولیات کو ریگولیٹ کرنے اور یقینی بنانے کے لئے سیاحوں اور عوام کی سہولیت کے لئے آج رات دیر گئے ٹنگمرگ کا دورہ کیا۔ ڈاکٹر سیّد سحرش اَصغر نے دورے کے دوران چار مطلوبہ مقامات کی نشاندہی کی جس کے لئے انہوں نے ایس ڈی ایم کو ایک تفصیلی منصوبہ تیار کرنے کی ہدایت دی تاکہ ان مقامات کو پارکنگ سہولیات کے لئے استعمال کیا جا سکے۔اِس موقعہ پرضلع ترقیاتی کمشنر نے بتایا کہ پارکنگ سہولیات کے حوالے سے لوگوں کے دیرینہ مطالبے کی نگرانی ہے اور ٹنگمرگ میں پارکنگ کی مناسب اور اِضافی سہولیات کو یقینی بنانے کے لئے جلد ہی اسے پورا کیا جائے گا۔اُنہوں نے سیاحتی نقطہ نظر کو اُجاگر کرتے ہوئے زیادہ گنجان آباد علاقے میں ٹریفک کے نظام کو ہموار اور بہتر بنانے کے لئے مشترکہ کوششیں کرنے کے علاوہ غلط پارکنگ اور سڑک کے کنارے تجاوزات کی روکتھام کے لئے اقدامات کرنے پر زور دیا۔ضلع ترقیاتی کمشنر بارہمولہ نے مختلف تجارتی اداروں کے نمائندوں کے ساتھ بات چیت کرتے ہوئے ان سے کہا کہ وہ شہر میں ٹریفک کے ہموار ریگولیشن کو یقینی بنانے میں بالخصوص گنجان آباد اور بھاری ٹریفک کے راستوں پر ٹریفک جام پر قابو پانے کے لئے اِنتظامیہ کے ساتھ تعاون کریں۔دریں اثناء ،ضلع ترقیاتی کمشنر سے علاقے کی مجموعی ترقی میں حائل رکاوٹ بننے والے دیگر مسائل پر تبادلہ خیال کیا گیا جس کے دوران متعلقہ اَفسران کو ان کے بروقت ازالہ کے لئے ضروری ہدایات دی گئیں۔ضلع ترقیاتی کمشنر کے ہمراہ سب ڈویڑنل مجسٹریٹ ٹنگمرگ، ایگزیکٹیو آفیسر، ایم سی ٹنگمرگ اور دیگر متعلقہ افسران بھی موجود تھے۔
