یوگا فلاح و بہبود کے جسمانی، نفسیاتی اور جذباتی پہلوؤں کو بڑھانے میں سب سے اہم کردار ادا کرتا ہے/ لیفٹنٹ گورنر
سرینگر// جموں و کشمیر کو بین الاقوامی یوگا دن کی تقریبات کی قیادت کرنے کا موقع دینے کیلئے وزیر اعظم کا شکر گزار ہوں کی بات کرتے ہوئے لیفٹنٹ گورنر منوج سنہا نے کہا کہ اس تاریخی واقعہ نے جموں کشمیر کو عالمی نقشے پر رکھ دیا ہے۔ انہوں نے مزید کہا کہ یوگا خوشی کی طرف ایک جامع نقطہ نظر ہے۔ یہ صحت مند زندگی کی طرف پہلا قدم ہے۔ یہ جسم اور دماغ کو متحد کرتا ہے جیسا کہ سنت پتنجلی نے کہا تھا کہ جسم اور دماغ ایک ہیں۔سی این آئی کے مطابق وزیر اعظم نریندر مودی نے سرینگر میں ہزاروں یوگا کے شوقینوں کے ساتھ یوگا کیا۔ اس یوگا کی تقریب میں لیفٹنٹ گور نر منوج سنہا بھی شامل تھے جنہوں نے تقریب سے خطاب کرتے ہوئے کہا ’’میں جموں و کشمیر کو بین الاقوامی یوگا دن کی تقریبات کی قیادت کرنے کا موقع دینے کیلئے وزیر اعظم کا شکر گزار ہوں۔ اس تاریخی واقعہ نے جموں کشمیر کو عالمی نقشے پر رکھ دیا ہے۔‘‘انہوں نے کہا’’یوگا فلاح و بہبود کے جسمانی، نفسیاتی اور جذباتی پہلوؤں کو بڑھانے میں سب سے اہم کردار ادا کرتا ہے۔ وزیر اعظم یوگا کو دنیا میں لے گئے ہیں اور آج ہماری قدیم روایت کا یہ انمول تحفہ پوری دنیا میں رائج ہے۔ ‘‘ لیفٹنٹ گورنر منوج سنہا نے کہا کہ یوگا خوشی کی طرف ایک جامع نقطہ نظر ہے۔ یہ صحت مند زندگی کی طرف پہلا قدم ہے۔ یہ جسم اور دماغ کو متحد کرتا ہے جیسا کہ سنت پتنجلی نے کہا تھا کہ جسم اور دماغ ایک ہیں۔ یوگا شعور لاتا ہے اور شعور کے ذریعے خالص خوشی پیدا ہوتی ہے۔ انہوں نے کہا ’’یوگا انسانیت کیلئے ہندوستان کا سب سے بڑا تحفہ ہے اور اس نے لوگوں کی زندگیوں میں خوشی لانے کے لیے مذہب، فرقہ اور جغرافیائی رکاوٹوں کی حدوں کو عبور کیا ہے‘‘۔ انہوں نے مزید کہا ’’بہتر صحت کی روک تھام پر مبنی اس بھرپور اور قدیم روایت کو طبی سائنس اور محققین نے روایتی نظام طب کی ایک منفرد اور اہم مشق کے طور پر قبول کیا ہے جو ہر عمر کے لوگوں کے لیے جسمانی اور ذہنی صحت کے زبردست فوائد پیش کرتا ہے‘‘۔ خطاب کے دوران لیفٹنٹ گورنر منوج سنہا نے مزید کہا ’’جسم اور دماغ موجودہ لمحے میں ایک ساتھ مل کر، یہاں اور اب تناؤ کی سطح کو کم کرنے میں مدد کرتا ہے، ذہن سازی لاتا ہے اور جسمانی طاقت کو بہتر بناتا ہے‘‘۔ ادھر وادی کشمیر کے دیگر علاقوں میں بھی عالمی یوگا دن کے موقعہ پر تقریبا ت کا انعقاد کیا گیا جس میں لوگوں کی خاصی تعداد نے شرکت کی ۔
