بھارتی افواج نے بے مثال مہارت اور مشترکہ طاقت کا مظاہرہ کیا//راج ناتھ سنگھ
سرینگر//یو این ایس// وزیر دفاع راجناتھ سنگھ نے آپریشن سندور کی پہلی برسی کے موقع پر کہا ہے کہ یہ کارروائی جدید جنگی حکمتِ عملی اور عسکری آپریشنز کے لیے ایک اہم معیار بن چکی ہے، جس نے بھارتی افواج کی درست کارروائی، مشترکہ ہم آہنگی اور پیشہ ورانہ مہارت کو دنیا کے سامنے نمایاں کیا۔یو این ایس کے مطابق جمعرات کو جاری اپنے پیغام میں وزیر دفاع نے بھارتی مسلح افواج کی بہادری اور قربانیوں کو خراجِ تحسین پیش کرتے ہوئے کہا کہ فوجیوں کی جرات اور فرض شناسی ملک کی سلامتی کی سب سے بڑی ضمانت ہے۔انہوں نے کہا،’’آپریشن سندور کے دوران ہماری افواج نے غیر معمولی درستگی، تینوں افواج کے درمیان بہترین تال میل اور مشترکہ حکمتِ عملی کا مظاہرہ کیا، جو جدید فوجی کارروائیوں کے لیے ایک نئی مثال بن گیا ہے۔‘‘راج ناتھ سنگھ نے کہا کہ یہ آپریشن قومی عزم، تیاری اور سلامتی کے خطرات سے مؤثر انداز میں نمٹنے کی بھارتی صلاحیت کی ایک مضبوط علامت ہے۔ ان کے مطابق بھارتی افواج ہر اْس وقت فیصلہ کن کارروائی کے لیے تیار رہتی ہیں جب ملک کی سلامتی کو خطرہ لاحق ہو۔انہوں نے دفاعی شعبے میں خود انحصاری کی پالیسی کا ذکر کرتے ہوئے کہا کہ آپریشن سندور بھارت کی ’’آتم نربھرتا‘‘ مہم کی کامیابی کا بھی ثبوت ہے، جس کے تحت دفاعی صلاحیتوں کو مضبوط بنانے اور فوجی نظام کو مزید مستحکم کرنے کی کوششیں جاری ہیں۔واضح رہے کہ گزشتہ سال 22 اپریل کو پہلگام میں ہوئے دہشت گرد حملے کے بعد بھارت نے 7 مئی 2025 کو ’’آپریشن سندور‘‘ شروع کیا تھا۔ اس کارروائی کے دوران پاکستان اور پاکستان کے زیر انتظام کشمیر میں موجود نو مبینہ دہشت گرد مراکز کو فضائی حملوں کے ذریعے نشانہ بنایا گیا تھا۔ حکام کے مطابق اس آپریشن میں کم از کم 100 دہشت گرد مارے گئے تھے۔وزارتِ دفاع کے مطابق کانفرنس میں سائبر وارفیئر، خلائی دفاع، ذہنی و معلوماتی جنگ (کاغنیٹو وارفیئر) اور مستقبل کی جنگی حکمتِ عملی جیسے ابھرتے ہوئے خطرات پر غور کیا جائے گا۔ اس کے ساتھ ساتھ مستقبل کی ضروریات کے مطابق ایک مضبوط، جدید اور ہر وقت تیار رہنے والی فوج کی تشکیل کے لیے روڈ میپ بھی تیار کیا جائے گا۔
