ترواننت پورم/یو این آئی// کیرالہ کے وزیراعلیٰ وی ڈی ستیسن نے راشٹریہ سویم سیوک سنگھ (آر ایس ایس) کے صد سالہ پروگرام میں ریاست کے تین وائس چانسلروں کی شرکت پر سخت اعتراض ظاہر کیا ہے ۔انہوں نے اس اقدام کو ایک سنگین غلطی قرار دیتے ہوئے تینوں وائس چانسلروں سے کیرالہ کے عوام سے معافی مانگنے کا مطالبہ کیا ہے ۔ اس پروگرام سے آر ایس ایس کے سربراہ موہن بھاگوت نے خطاب کیا تھا۔وزیراعلیٰ نے سوشل میڈیا پلیٹ فارم ‘ایکس’ پر لکھا کہ تین وائس چانسلروں کا اس پروگرام میں شرکت کرنا انتہائی تشویش ناک ہے ۔ انہوں نے کہا کہ ان کا یہ اقدام کیرالہ کی عظیم تعلیمی روایت اور ان کے باوقار عہدے کے وقار کے منافی ہے ۔ستیسن نے کہا کہ کیرالہ کے عوام وائس چانسلر کے منصب کو بہت عزت اور احترام کی نگاہ سے دیکھتے ہیں، لیکن ایک ایسے پروگرام میں شرکت کرکے جس کی قیادت ایک ایسے رہنما نے کی جو ان کے بقول فرقہ وارانہ نظریات کی نمائندگی کرتے ہیں، ان وائس چانسلروں نے عوام کے اعتماد اور احترام کو ٹھیس پہنچائی ہے ۔انہوں نے سخت الفاظ میں کہا کہ فرقہ واریت کو فروغ دینے والا کوئی بھی عمل قابل قبول نہیں ہو سکتا، چاہے اسے کوئی بھی انجام دے ۔ ان کے مطابق ایسی حرکت کو ہرگز معاف نہیں کیا جا سکتا، اس لیے پروگرام میں شریک تینوں وائس چانسلروں کو فوری طور پر کیرالہ کے عوام سے معافی مانگنی چاہیے ۔
