سرینگر//جموں و کشمیر کے کئی حصوں میں حالیہ سیلاب کی وجہ سے زندگی متاثر ہونے کے بعد وزیر برائے خوراک ، سول سپلائیز اینڈ کنزیومر افئیرز ، انفارمیشن ٹیکنالوجی ، ٹرانسپورٹ ، یوتھ سروسز اینڈ سپورٹس مسٹر ستیش شرما نے آج ایک اعلیٰ سطحی اجلاس طلب کیا تا کہ جموں و کشمیر میں کھانے پینے کی اجناس ، ایل پی جی اور پیٹرولیم مصنوعات سمیت ضروری اشیاء کی دستیابی اور تقسیم کا جائیزہ لیا جا سکے ۔ اجلاس میں کمشنر سیکرٹری خوراک ، سول سپلائیز اینڈ کنزیومر افئیرز کے علاوہ محکمے کے سینئر افسران نے شرکت کی ۔ اجلاس کے دوران وزیر موصوف کو بتایا گیا کہ تمام اضلاع میں کھانے پینے کی اجناس اور ضروری اشیاء کے مناسب ذخائیر موجود ہیں ۔ اگست کے مہینے کا راشن پہلے ہی تقسیم کیا جا چکا ہے جبکہ کچھ سیلاب سے متاثرہ اور کمزور علاقوں میں ستمبر کا کوٹہ بھی پیشگی جاری کیا گیا ہے تا کہ سپلائی میں کوئی رکاوٹ نہ آئے ۔ وزیر نے افسران سے بات چیت کرتے ہوئے کہا ’’ حکومت جموں و کشمیر میں خوراک ، ایل پی جی اور دیگر ضروری اشیاء کی بلا تعطل دستیابی کو یقینی بنانے کیلئے پوری طرح پُر عزم ہے ، یہاں تک کہ قدرتی آفات کے باوجود میں عوام کو یقین دلانا چاہتا ہوں کہ خوراک کے ذخیرے کی کوئی کمی نہیں ہے ۔ ہر گھر تک پہنچنے کیلئے تمام ممکنہ اقدامات کئے جا رہے ہیں ، جن میں متبادل راستوں کے ذریعے سڑک کے ذریعے نقل و حمل اور ناقابل رسائی علاقوں میں فضائی ترسیل شامل ہے ۔ ‘‘ وزیر نے افسران کو ہدایت دی کہ وہ ضلعی انتظامیہ اور فیلڈ کارکنوں کے ساتھ قریبی رابطہ رکھیں تا کہ زمینی صورتحال کی باقاعدہ نگرانی کی جا سکے اور ابھرتے ہوئے چیلنجوں سے نمٹنے کیلئے فعال رویہ اپنایا جائے ۔ انہوں نے زور دیا کہ دور دراز اور کمزور علاقوں پر خصوصی توجہ دی جانی چاہئیے تا کہ مساوی ترسیل کو یقینی بنایا جا سکے اور عوام کو کسی قسم کی مشکل کا سامنا نہ کرنا پڑے ۔ مسٹر شرما نے مشکل حالات میں انتھک محنت کرنے والے خوراک و سول سپلائیز ڈیپارٹمنٹ کے افسران ، فرنٹ لائن ورکرز اور مختلف تیل کمپنیوں کے کردار کی تعریف کی اور مکمل معمولات بحال ہونے تک مسلسل لگن کے ساتھ کام جاری رکھنے کی اپیل کی ۔
