سری نگر/جموں// ہاکی کے میجر دھیان چند کی یوم ولادت کی یاد میں نیشنل سپورٹس ڈے جموںوکشمیر کے تمام اَضلاع میں جوش و خروش کے ساتھ منایا گیا۔صوبہ جموں میں مختلف کھیلوں سے تعلق رکھنے والے دو سو سے زائد کھلاڑیوں نے ’کے کے ہکو سٹیڈیم ‘میں منعقدہ مرکزی تقریب میں شرکت کی اور اُنہوں نے وہاں عظیم اولمپئن میجر دھیان چند کو گلدستے پیش کر کے خراج عقیدت پیش کیاجن کی شراکت نے ملک کے لئے اولمپک کے متعدد اعزازات حاصل کئے ہیں۔یہ پروگرام جموں و کشمیر سپورٹس کونسل، ایس اے آئی ایس ٹی سی جموں اور ہاکی ایسوسی ایشن آف جے کے کے اشتراک سے منعقد کیا گیا جس کا اِختتام قومی ترانے کے ساتھ ہوا۔ اِس موقعہ پر بندھو رکھ کلب اور گورو نانک کلب کے درمیان ایک نمائشی ہاکی میچ بھی کھیلا گیا جو تقریب کا اہم حصہ رہا۔اِس کے علاوہ جموں و کشمیر کے تمام اضلاع میں کھیلوں کے مقابلے اور سرگرمیاں منعقد کی گئیں جن میں نوجوانوں اور کھلاڑیوں نے بھرپور جوش و جذبے سے حصہ لیا۔ پی ایم ڈی پی مراکز، کھیلوں انڈیا مراکز اور جے کے سپورٹس کونسل کے ان ہاؤس مراکز میں بھی تقریبات ہوئیں جہاں دیہی اور شہری دونوں علاقوں میں افسران نے تقریبات کی صدارت کی جو نیشنل سپورٹس ڈے کی شمولیتی روح کی عکاسی کرتی ہیں۔اِس موقعہ پر وزیر برائے اَمور نوجوان و کھیل کود ستیش شرما نے کہا،’’ نیشنل سپورٹس ڈے نظم و ضبط، استقامت اور اتحاد کی ان اقدار کی یاددہانی کرتا ہے جو کھیل ہماری زندگیوں میں لاتے ہیں۔ جموں و کشمیر کے کونے کونے میں نوجوانوں کو ان تقریبات میں شرکت کرتے ہوئے دیکھ کر ہمیں فخر ہوتا ہے۔ ہمیں چاہیے کہ ہم نوجوان کھلاڑیوں کی حوصلہ افزائی جاری رکھیں اور انہیں نچلی سطح سے تربیت دے کر ایسے چیمپئنز بنائیں جو ملک کا نام روشن کریں۔‘‘سری نگر میں کمشنر سیکرٹری اَمورِ نوجوان و کھیل کودسرمد حفیظ اور سیکرٹری جموںوکشمیر سپورٹس کونسل نزہت گل نے پولو گراؤنڈ سپورٹس کمپلیکس کا دورہ کیا جہاں اُنہوں نے ہاکی، فٹ بال (سپورٹس کونسل فٹ بال اکیڈمی)، تائیکوانڈو، تیراندازی اور بیڈمنٹن کی تربیت حاصل کرنے والے کھلاڑیوں سے بات چیت کی۔ اِس موقعہ پر ایک نمائشی ہاکی میچ کھیلا گیا اور کھلاڑیوں میں کِٹس بھی تقسیم کی گئیں۔مزید برآں، سری نگرمیں ایک پُروقار تقریب بھی منعقد ہوئی جس میں ان تمام محکموں اور اداروں کو اعزازات سے نوازا گیا جنہوں نے کھیلو انڈیا واٹر سپورٹس فیسٹول ۔ 2025 کے کامیاب اِنعقاد میں اپنا رول ادا کیاہے۔ یہ فیسٹول اس مہینے کے آغاز میں ڈل جھیل پر منعقد ہوا تھا جس میں ملک بھر سے کھلاڑیوں اور شائقین نے شرکت کی۔سرمد حفیظ نے کہا،’’ضلع، مراکز اور سپورٹس کمپلیکس کی سطح پر ہونے والی تقریبات اس بات کا ثبوت ہیں کہ جموں و کشمیر میں کھیلوں کی ثقافت مضبوط بنیادوں پر قائم ہو رہی ہے۔ ہمارا مقصد جدید سہولیات، پیشہ ورانہ کوچنگ اور ہر طبقے کے کھلاڑیوں کو برابر مواقع فراہم کر کے اس نظام کو مزید مضبوط بنانا ہے۔‘‘نزہت گل نے کہا،’’نیشنل سپورٹس ڈے کے ذریعے ہم نہ صرف میجر دھیان چند کی وراثت کا احترام کرتے ہیں بلکہ دیہی و شہری علاقوں میں ٹیلنٹ کو پروان چڑھانے کے لئے اپنے عزم کا اعادہ کرتے ہیں۔ کھیلو اِنڈیا اور پی ایم ڈی پی جیسے اقدامات کے ساتھ ہر کھلاڑی کو خواہ کسی بھی پس منظر سے تعلق رکھتے ہوں، کو مقابلہ کرنے اور بہترین کارکردگی کا موقع ملتا ہے۔‘‘جموں و کشمیر بھر میں ہونے والی یہ تقریبات جن میں میچوں، اعزازات کی تقسیم، کِٹس کی تقسیم اور ضلعی سطح کی سرگرمیاں شامل تھیں ۔ جے کے سپورٹس کونسل کے فعال کردار، بین المحکماتی تعاون اور ہندوستان کے عظیم کھلاڑیوں کی میراث کو آگے بڑھانے کی کوششوں کی بھرپور عکاسی کرتی ہیں۔
