فوج چوکی کے دورے کے دوران ہند چین سرحد پر چینی پیپلز لبریشن آرمی کے اہلکاروں سے بات چیت کی
سرینگر// مرکزی وزیر کرن رججو نے کہا کہ انہوں نے دیوالی کے موقع پر بھارتی فوج کی چوکی کے دورے کے دوران ہند چین سرحد پر چین کی پیپلز لبریشن آرمی کے اہلکاروں کے ساتھ بات چیت کی۔سی این آئی کے مطابق مرکزی وزیر کرن رججونے اروناچل پردیش کے بملا میں فوج کے اہلکاروں کے ساتھ دیوالی منائی۔ایکس پر پوسٹ کی گئی مختصر ویڈیو میں پارلیمانی اور اقلیتی امور کے مرکزی وزیر کو ایک ترجمان کے ذریعے پی ایل اے کے تین فوجیوں سے بات کرتے ہوئے دیکھا گیا ہے کہ وہ سمندر سے 15000 فٹ کی بلندی پر واقع اتنے اونچے علاقے میں تعینات ہونے کے دوران کیسے انتظام کر رہے ہیں۔ پی ایل اے کے اہلکاروں نے جواب دیا کہ ایسے علاقوں میں خدمات انجام دیتے ہوئے انہیں کوئی پریشانی نہیں ہوئی اور وہ آرام سے ہیں۔رججو نے بین الاقوامی سرحد پر حکومت کی طرف سے کئے جانے والے بنیادی ڈھانچے اور دیگر ترقیاتی کاموں کی بھی تعریف کی۔ رججو نے کہا کہ چینی فوجیوں سے بات کرنے اور بنیادی ڈھانچے کو دیکھنے کے بعد، اب ہر کوئی ہندوستان کی سرحدی ترقی پر فخر محسوس کرے گا۔ خیال رہے کہ مرکزی وزیر، جن کا تعلق اروناچل پردیش سے ہے، نے بھی بات چیت کی اور ہندوستانی فوج کے جوانوں کے ساتھ وقت گزارا اور ان کے ساتھ دیوالی منائی۔واضح رہے کہ پی ایل اے کے سپاہیوں کے ساتھ رججو کی بات چیت تقریباً 10 دن بعد ہوئی جب سکریٹری خارجہ وکرم مصری نے کہا کہ ہندوستان اور چین کے درمیان 2020 میں پیدا ہونے والے مسائل کے حل کے لیے ایک معاہدہ طے پا گیا ہے۔
