تمام 40 کارکن محفوظ ،انہیں پائپوں کے ذریعے آکسیجن فراہم کی جا رہی ہے/ حکومت
سرینگر // اتراکھنڈ ٹنل میں پھنسے 40 مزدور کو بچانے کیلئے بڑے پیمانے پر آپریشن جاری ہے ۔ سٹار نیوز نیٹ ورک کے مطابق اتراکھنڈ میں کل صبح ایک زیر تعمیر سرنگ کا ایک حصہ منہدم ہوگیا۔ جس کے بعد سرنگ میں پھنسے مزدوروں کو بچانے کیلئے رات بھر ملٹی ایجنسی آپریشن کیا گیا۔ بتادیں کہ اترکاشی ضلع کے سلکیارا میں برہمکھل یمونوتری شاہراہ پر ایک زیر تعمیر سرنگ کل صبح تقریباً 5 بجے جزوی طور پر منہدم ہوگئی، جس سے 40 مزدور اندر پھنس گئے۔ اتراکھنڈ کے وزیر اعلیٰ پشکر سنگھ دھامی اترکاشی-یمنوتری روڈ پر واقع سلکیارا ٹنل میں زمین کے گرنے کا سائٹ پر معائنہ کرنے اور کل سے جاری راحت اور بچاؤ کاموں کا جائزہ لینے سلکیارا پہنچے۔اتراکھنڈ کے وزیر اعلیٰ پشکر سنگھ دھامی نے کہا’’تمام ماہر ایجنسیاں مزدوروں کو محفوظ طریقے سے نکالنے کیلئے کام کر رہی ہیں۔ اس وقت ہماری ترجیح تمام 40 کارکنوں کو نکالنا ہے۔ ہم ان کے اہل خانہ کو یقین دلانا چاہتے ہیں کہ مرکز اور ریاستی حکومت ہر ممکن کوشش کر رہی ہے‘‘۔ ریسکیو کا 24 گھنٹے سے سرنگ میں پھنسے مزدوروں کو نکالنے کا کام جاری ہے۔ریاستی ڈیزاسٹر ریلیف فورس (ایس ڈی آر ایف) اور پولیس کی طرف سے راحت اور بچاؤ کی کارروائیاں چل رہی ہیں۔ اس وقت 24 گھنٹے ہوچکے ہیں اور ریسکیو آپریشن مسلسل جاری ہے۔ ابھی تک مالوا 15 سے 20 میٹر تک نکل چکا ہے۔مزدوروں کو پائپوں کے ذریعے آکسیجن فراہم کی جا رہی ہے۔ایک سینئر اہلکار نے این ڈی ٹی وی کو بتایا کہ تمام 40 کارکن محفوظ ہیں اور انہیں پائپوں کے ذریعے آکسیجن فراہم کی جا رہی ہے۔ پرشانت کمار نے کہا،’’ہر کوئی محفوظ ہے، ہم پھنسے ہوئے کارکنوں کے ساتھ مسلسل رابطے میں ہیں‘‘۔اب تک تقریباً 20 میٹر سلیب ہٹا دی گئی ہے۔انہوں نے کہا کہ سرنگ (اتراکھنڈ ٹنل کولپس) میں پھنسے مزدوروں کے لیے پانی اور کھانے کی اشیاء بھی بھیجی جا رہی ہیں۔ سرنگ کا منہدم ہونے والا حصہ داخلی دروازے سے تقریباً 200 میٹر کے فاصلے پر واقع ہے اور سرنگ کو کھولنے کے لیے اب تک تقریباً 20 میٹر کا سلیب ہٹایا جا چکا ہے۔
