ذیابیطس (شوگر) کے پھیلاؤ کو روکنے اور اس کی تشخیص کے لیے ہر سال 14 نومبر کو عالمی یوم ذیابیطس منایا جاتا ہے۔ ہفتے کے روز عالمی یوم ذیابیطس کے موقع پر عالمی ادارۂ صحت (ڈبلیو ایچ او) کی جانب سے سوشل میڈیا پر اس کی علامات اور بچاؤ سے متعلق معلومات شیئر کی گئی ہیں۔ ڈبلیو ایچ او نے سوشل میڈیا پلیٹ فارم ’ایکس‘ پر ایک پوسٹ میں لکھا ہے کہ آج عالمی یوم ذیابیطس ہے۔ کیا آپ ذیابیطس کی علامات پہچان سکتے ہیں؟ ڈبلیو ایچ او نے اس کی علامات بتاتے ہوئے کہا کہ اگر کسی کو بہت زیادہ پیاس لگ رہی ہو، بار بار پیشاب آتا ہو، نظر دھندلی ہو گئی ہو، تھکاوٹ محسوس ہو رہی ہو، زخم دیر سے بھر رہے ہوں اور بار بار انفیکشن ہو رہا ہو تو اسے ذیابیطس کی جانچ کرانی چاہیے۔ڈبلیو ایچ او نے مشورہ دیا ہے کہ ٹائپ 1 ذیابیطس اکثر تیزی سے بڑھتی ہے۔ اگر آپ میں ذیابیطس کی علامات ظاہر ہوں تو فوری طور پر ڈاکٹر سے رجوع کریں۔ ٹائپ 2 ذیابیطس عام طور پر آہستہ آہستہ بڑھتی ہے اور اس کی علامات بہت کم یا بالکل بھی ظاہر نہیں ہوتیں۔ اگر کسی کو شبہ ہو کہ اسے ذیابیطس ہو سکتی ہے، تو اسے ڈاکٹر یا صحت کارکن سے مشورہ کرنا چاہیے۔ ڈبلیو ایچ او نے ذیابیطس کے حوالے سے ایک مضمون میں تفصیلی معلومات فراہم کی ہیں، جس کا لنک اپنے سرکاری ایکس ہینڈل پر بھی شیئر کیا ہے۔ ڈبلیو ایچ او کے مطابق دنیا بھر میں ذیابیطس سے متاثرہ 40 فیصد سے زیادہ لوگوں کو اس بیماری کا علم ہی نہیں ہو پاتا۔ اس کی وجہ سے بغیر تشخیص کے ذیابیطس میں مبتلا افراد کو اپنی بیماری پر قابو پانے اور صحت مند زندگی گزارنے کے لیے ضروری دیکھ بھال، علاج اور تعاون نہیں مل پاتا۔
ڈبلیو ایچ او نے بتایا ہے کہ ذیابیطس کی علامات سے واقفیت لوگوں کو یہ پہچاننے میں مدد دے سکتی ہے کہ انہیں کب طبی مدد حاصل کرنی چاہیے۔ ٹائپ 1 ذیابیطس اکثر تیزی سے بڑھتی ہے، جبکہ ٹائپ 2 ذیابیطس عام طور پر آہستہ آہستہ بڑھتی ہے اور اس میں کچھ علامات ظاہر ہو سکتی ہیں یا کوئی خاص علامت بھی ظاہر نہیں ہوتی۔ ڈبلیو ایچ او کے مطابق اس سال عالمی یوم ذیابیطس کا موضوع ’ذیابیطس کے خلاف فوری کارروائی‘ ہے۔ اس موضوع کے ذریعے جلد تشخیص، جامع طبی سہولیات تک رسائی اور ذیابیطس سے وابستہ سماجی امتیاز کو کم کرنے کی اہمیت پر زور دیا گیا ہے۔ تشخیص کے فرق کو کم کرنا عالمی سطح پر ایک ترجیح ہے۔ ڈبلیو ایچ او کے رکن ممالک کی حمایت یافتہ ذیابیطس سے متعلق 5 عالمی اہداف میں سے ایک ہدف یہ ہے کہ 2030 تک ذیابیطس میں مبتلا 80 فیصد افراد کی تشخیص ہو جائے۔
