ہندوستانی اسپن گیندباز سری چرنی نے آئی سی سی ویمنز ٹی ۲۰؍ انٹرنیشنل بولنگ رینکنگ میں اب تک کی سب سے زیادہ ریٹنگ حاصل کرکے نیا ریکارڈ قائم کیا ہے۔ بائیں ہاتھ کی اسپن گیندباز سری چرنی، جو پہلے ہی ٹی ۲۰؍ انٹرنیشنل کی نمبر ایک گیندباز ہیں، نے جاپان میں حالیہ شاندار کارکردگی کے بعد ۸۱۷؍ پوائنٹس حاصل کیے۔ اس کے ساتھ ہی انہوں نے آسٹریلیا کی میگن شوٹ کا نومبر ۲۰۱۸ء میں قائم کیا گیا ۸۰۶؍ پوائنٹس کا سابقہ ریکارڈ توڑ دیا۔
ہندوستان کی ایشیا کپ میں آٹھویں مرتبہ خطاب جیتنے کی مہم میں سری چرنی نے اہم کردار ادا کرتے ہوئے ۱۲؍ وکٹ حاصل کئے تھے ، جن میں سری لنکا کے خلاف فائنل میں ۲۰؍ رن دے کر چار وکٹیں بھی شامل تھیں۔ ہندوستان نے یہ میچ ۷۲؍ رن سے جیت کر آٹھویں بار ٹائٹل اپنے نام کیا تھا۔اس کے چند دن بعد جاپان میں ایشین گیمز کے دوران انہوں نے میزبان جاپان کے خلاف ۱۰؍ رن دے کر چار وکٹوں کی کریئر کی بہترین کارکردگی پیش کی اور ہندوستان کو سیمی فائنل میں پہنچایا۔ ۲۲؍ ستمبر کو سری لنکا کے خلاف گولڈ میڈل میچ میں انہوں نے دو وکٹ حاصل کئے۔ ہندوستان نے یہ مقابلہ ۱۴۷؍ رن سے جیتا اور سری چرنی کی ریٹنگ ۸۱۷؍پوائنٹس تک پہنچ گئی۔
ایشین گیمز کے فائنل میں دپتی شرما نے ۳؍ وکٹیں حاصل کیں، جس سے وہ ٹی ۲۰؍ انٹرنیشنل بولنگ رینکنگ میں ۷۵۴؍پوائنٹس کے ساتھ دوسرے نمبر پر پہنچ گئی ہیں، جبکہ انگلینڈ کی سوفی ایکل اسٹون ۷۲۳؍ پوائنٹس کے ساتھ تیسرے نمبر پر ہیں۔بلے بازوں کی رینکنگ میں اسمرتی مندھانا دوبارہ ٹاپ پانچ میں شامل ہوگئی ہیں۔
انہوں نے ایشین گیمز کے فائنل میں سری لنکا کے خلاف ہندوستان کی جیت میں ۷۹؍ رن کی اننگز کھیلی تھی۔
ہرارے میں زمبابوے اور ویسٹ انڈیز کے درمیان ون ڈے سیریز کے نتیجے میں بھی رینکنگ میں کئی اہم تبدیلیاں ہوئی ہیں۔ دونوں ٹیموں کے درمیان سیریز اس وقت ۱۔۱؍سے برابر ہے۔ ویسٹ انڈیز کی ہیلی میتھیوز تین مقام کی بہتری کے ساتھ ۷۱۱؍ پوائنٹس پر چوتھے نمبر پر پہنچ گئی ہیں۔ انہوں نے پہلے ون ڈے میں ریکارڈ۱۸۲؍ رن کی اننگز کھیلی تھی۔
زمبابوے کی ریلیانا گریمونڈ ۲۷۰؍ پوائنٹس کے ساتھ ۳۴؍ مقام کی چھلانگ لگا کر مشترکہ طور پر ۱۰۲؍ ویں نمبر پر پہنچ گئی ہیں۔ ان کی ساتھی نیایشا گوانزورا نے دوسرے ون ڈے میں ویسٹ انڈیز کے خلاف ٹیم کو یادگار کامیابی دلانے میں اہم کردار ادا کیا۔ انہوں نے ناٹ آؤٹ ۱۸؍ رن بنانے کے ساتھ ۳۳؍ رن دے کر چار وکٹیں حاصل کیں اور خواتین کی ون ڈے بولنگ رینکنگ میں ۵۲؍ مقام کی بہتری کے ساتھ ۱۵۶؍ویں نمبر پر پہنچ گئی ہیں۔
زمبابوے کی موڈیسٹر مپاچیکوا دو میچوں میں ۸۶؍ اور ۳۸؍رن کی اننگز کی بدولت ۱۶؍ مقام کی بہتری کے ساتھ کریئر کی بہترین ۴۰؍ویں پوزیشن پر پہنچ گئی ہیں۔ ان کے ۴۹۲؍پوائنٹس ہیں۔ فرانسسکا چیپارے بھی ۲۶؍مقام کی بہتری کے ساتھ مشترکہ طور پر ۱۲۳؍ ویں نمبر پر پہنچ گئی ہیں۔ ویسٹ انڈیز کی اشمینی منیسر ۲۳؍ مقام کی بہتری کے ساتھ مشترکہ طور پر ۸۴؍ ویں اور عالیہ ایلین آٹھ مقام کی بہتری کے ساتھ ۵۸؍ ویں نمبر پر پہنچ گئی ہیں۔ ایلین نے سیریز کے پہلے میچ میں ۴۴؍ رن دے کر تین اور دوسرے میچ میں ۲۷؍ رن دے کر دو وکٹ حاصل کئے جبکہ منیسر نے دونوں میچوں میں ۵ء۱۰؍ کی اوسط سے چار وکٹیں حاصل کیں۔
آسٹریلیا کی ایش گارڈنر۴۹۷؍ پوائنٹس کے ساتھ ون ڈے آل راؤنڈر رینکنگ میں سرفہرست ہیں، جبکہ ہیلی میتھیوز ۵۰۲؍ پوائنٹس کے ساتھ ٹی ۲۰؍ انٹرنیشنل آل راؤنڈر رینکنگ میں پہلے نمبر پر ہیں۔ الانا کنگ ۷۵۳؍ پوائنٹس کے ساتھ ون ڈے بولنگ رینکنگ میں سرفہرست ہیں۔ بیتھ مونی ۷۸۵؍ پوائنٹس کے ساتھ ٹی۲۰؍ انٹرنیشنل بلے بازوں کی رینکنگ میں پہلے نمبر پر ہیں، جبکہ اسمرتی مندھانا ۷۹۰؍ پوائنٹس کے ساتھ ون ڈے بلے بازوں کی رینکنگ میں سرفہرست ہیں۔ وہ دوسرے نمبر پر موجود لورا وولوارٹ سے آٹھ پوائنٹس آگے ہیں۔
