جاوید ڈار نے عید میلادالنبی ﷺ پر لوگوں کو مبارکباد پیش کی

سرینگر//وزیر برائے زراعت ، دیہی ترقی اور پنچائتی راج ، کواپریٹوز اینڈ الیکشن مسٹر جاوید احمد ڈار نے عید میلاد النبی ﷺ کے مبارک موقع پر جموں و کشمیر کے لوگوں کو اپنی گرم جوش مبارکباد اور نیک خواہشات پیش کی ہیں ۔ اپنے پیغام میں وزیر نے کہا کہ یہ مبارک موقع حضرت محمد ﷺ کی مثالی زندگی اور لازوال تعلیمات پر غور کرنے کا موقع فراہم کرتا ہے جو انسانیت کو امن ، ہمدردی ، بھائی چارے ، رواداری ، انصاف ، عاجزی اور انسانیت کی خدمت کی طرف متوجہ کرتی رہتی ہیں ۔ مسٹر جاوید ڈار نے کہا کہ حضرت محمد ﷺ کی تعلیمات انسانی وقار کے احترام ، کمزوروںکی دیکھ بھال ، معافی اور پرامن بقائے باہمی پر زور دیتی ہیں ۔ انہوں نے لوگوں سے اپیل کی کہ وہ ان اقدار کو اپنی روز مرہ زندگی میں اپنائیں اور معاشرے میں سماجی ہم آہنگی ، باہمی احترام اور فرقہ وارانہ دوستی کے رشتوں کو مضبوط بنانے کیلئے اجتماعی طور پر کام کریں ۔ وزیر نے امید ظاہر کی کہ یہ مبارک موقع جموں و کشمیر کے لوگوں کیلئے امن ، خوشحالی ، خوشی اور بہبود کا پیغام لائے گا اور یونین ٹیریٹری بھر میں اتحاد اور بھائی چارے کے جذبے کو مزید تقویت دے گا ۔