امریکی صدر ڈونالڈ ٹرمپ نے ’وائٹ ہاؤس کوریسپونڈنٹس ایسوسی ایشن‘ (ڈبلیو ایچ سی اے) کے عشائیے سے خطاب کرتے ہوئے اپنے مخصوص انداز میں تقریر کی۔ تقریباً ایک گھنٹے کے خطاب میں انہوں نے صحافیوں، میڈیا اداروں اور اپنے سیاسی مخالفین پر خوب طنز کیا۔ اس دوران ٹرمپ نے مزاحیہ انداز میں یہ بھی کہا کہ وہ امریکہ کے صدارتی عہدے کے لیے چوتھی بار بھی انتخاب لڑیں گے۔ ٹرمپ نے اسٹیج پر سرخ رنگ کی ’ٹرمپ 2028‘ کیپ بھی پہن رکھی تھی۔ انہوں نے کہا کہ ’’آج رات میں پریس کی ریٹنگ بچانے کے لیے چوتھی مدت کے لیے الیکشن لڑنے کی اپنی خواہش کا اعلان کرتا ہوں۔‘‘ حالانکہ انہوں نے یہ بیان محض مذاق میں دیا تھا، کیونکہ امریکی آئین کے مطابق کوئی بھی شخص زیادہ سے زیادہ 2 مرتبہ ہی صدر منتخب ہو سکتا ہے۔
ٹرمپ نے صحافیوں سے خطاب کرتے ہوئے کہا کہ جب وہ صدارت چھوڑ دیں گے تو میڈیا کو بڑی مشکلیں پیش آئیں گی۔ انہوں نے کہا کہ ’’جب میں چلا جاؤں گا تو آپ سبھی برباد ہو جائیں گے۔ آپ کے پاس رپورٹ کرنے کے لیے کوئی نہیں ہوگا اور آپ کا بزنس ماڈل ختم ہو جائے گا۔‘‘ انہوں نے مزید کہا کہ لوگ دوسروں کی خبروں میں اتنی دلچسپی نہیں لیتے، اسی لیے وہ پریس کی ریٹنگ بچانے کے لیے چوتھی مدت کی بات کر رہے ہیں۔
اس تقریب کا آغاز وائٹ ہاؤس کوریسپونڈنٹس ایسوسی ایشن کی سبکدوش ہونے والی صدر ویجیا جیانگ کے خطاب سے ہوا۔ انہوں نے اپریل میں ہونے والے اس حملے کا ذکر کیا، جس میں ایک مسلح شخص نے اس تقریب کو نشانہ بنایا تھا۔ انہوں نے کہا کہ اس حملے نے سب کا امتحان لیا اور یہ ثابت کیا کہ صحافت اور آزادیٔ صحافت کے لیے جدوجہد جاری رکھنا ضروری ہے۔ اسی حملے کے بعد اس عشائیے کا دوسری بار انعقاد کیا گیا۔ اس تقریب میں متعدد صحافیوں کو اعزازات سے بھی نوازا گیا۔ ان میں بعض ایسے صحافی بھی شامل تھے، جن پر ٹرمپ پہلے تنقید کر چکے تھے۔ وال اسٹریٹ جرنل کی وہ ٹیم بھی اعزاز حاصل کرنے والوں میں شامل تھی، جس نے ٹرمپ اور جیفری ایپسٹین سے متعلق معاملے پر رپورٹنگ کی تھی۔
