موسمی صورتحال اور تعلیمی تقاضوں کو مدنظر رکھ کر حتمی فیصلہ کیا جائے گا// سکینہ ایتو
سرینگر// جموں و کشمیر کی وزیر تعلیم، صحت و طبی تعلیم اور سماجی بہبود سکینہ ایتو نے کہا ہے کہ گرمیوں کی جاری تعطیلات میں ممکنہ توسیع کے بارے میں حتمی فیصلہ موجودہ صورتحال کا مکمل جائزہ لینے کے بعد ہی کیا جائے گا۔یو این ایس کے مطابق جنوبی کشمیر کے ضلع کولگام کے ڈی ایچ پورہ کے دورے کے موقع پر نامہ نگاروں سے بات کرتے ہوئے سکینہ ایتو نے کہا کہ حکومت موسمی حالات اور دیگر متعلقہ عوامل پر مسلسل نظر رکھے ہوئے ہے اور اسکول دوبارہ کھولنے سے متعلق کسی بھی اعلان سے قبل تمام پہلوؤں کا بغور جائزہ لیا جا رہا ہے۔ انہوں نے کہا، گرمیوں کی تعطیلات میں توسیع کے حوالے سے فیصلہ تمام حالات کا جائزہ لینے کے بعد کیا جائے گا۔ حکومت صورتحال کا باریک بینی سے جائزہ لے رہی ہے تاکہ جو بھی فیصلہ کیا جائے وہ طلبہ اور تعلیمی شعبے کے بہترین مفاد میں ہو۔وزیر تعلیم کا یہ بیان ایسے وقت سامنے آیا ہے جب جموں و کشمیر کے مختلف علاقوں میں وقفے وقفے سے ہونے والی بارشوں اور بدلتے موسمی حالات کے باعث گرمیوں کی تعطیلات میں توسیع کا مطالبہ زور پکڑ رہا ہے اور اس حوالے سے مختلف قیاس آرائیاں بھی کی جا رہی ہیں۔سکینہ ایتو نے کہا کہ حکومت طلبہ کی صحت اور فلاح و بہبود کو یقینی بنانے کے ساتھ ساتھ تعلیمی کیلنڈر کو بھی کم سے کم متاثر کرنے کے لیے پرعزم ہے۔ انہوں نے واضح کیا کہ حتمی فیصلہ کرتے وقت محکمہ موسمیات کی پیش گوئیوں، موسمی صورتحال اور تعلیمی ضروریات سمیت تمام متعلقہ عوامل کو مدنظر رکھا جائے گا۔
