سرینگر// ایڈمرل کرشنا سوامی ناتھن نے اتوار کو بھارتی بحریہ کے نئے سربراہ (چیف آف نیول اسٹاف) کی حیثیت سے عہدہ سنبھال لیا۔ انہوں نے ایڈمرل دنیش کمار ترپاٹھی کی جگہ یہ ذمہ داری سنبھالی، جو اپنی مدتِ ملازمت مکمل کرنے کے بعد سبکدوش ہوگئے۔یو این ایس کے مطابق عہدہ سنبھالنے سے قبل ایڈمرل سوامی ناتھن مغربی بحری کمان کے فلیگ آفیسر کمانڈنگ اِن چیف کے طور پر خدمات انجام دے رہے تھے۔عہدہ سنبھالنے کے بعد صحافیوں سے گفتگو کرتے ہوئے نئے بحریہ سربراہ نے خطے کی موجودہ سکیورٹی صورتحال کو “چیلنجنگ، پیچیدہ اور غیر یقینی” قرار دیتے ہوئے کہا کہ بحریہ کی مکمل آپریشنل تیاری اور جنگی استعداد کو برقرار رکھنا ان کی اولین ترجیح ہوگی۔انہوں نے کہا کہ بھارتی بحریہ قومی مفادات کے تحفظ کے لیے ہر وقت چوکس ہے اور ایک ایسے علاقائی سکیورٹی ماحول میں سرگرم کردار ادا کر رہی ہے جو مسلسل پیچیدہ اور غیر متوقع صورت اختیار کرتا جا رہا ہے۔ایڈمرل سوامی ناتھن نے کہا کہ ان کی بھرپور کوشش ہوگی کہ بحریہ کی آپریشنل تیاری اور جنگی صلاحیت کو اعلیٰ ترین سطح پر برقرار رکھا جائے تاکہ ملک کے سکیورٹی اور معاشی مفادات کا مؤثر تحفظ یقینی بنایا جا سکے۔انہوں نے کہا کہ بھارتی بحریہ جدیدکاری اور صلاحیت میں اضافے کی راہ پر گامزن ہے اور وہ جاری پروگراموں کو مستحکم بنانے، ضرورت کے مطابق ان میں توسیع لانے اور نئی و ابھرتی ہوئی ٹیکنالوجیز کو شامل کرکے آپریشنل صلاحیتوں کو مزید مضبوط بنانے پر توجہ دیں گے۔نئے بحریہ سربراہ نے کہا کہ وہ اپنی تمام تر صلاحیتیں بحریہ کو مزید مضبوط، مؤثر اور جدید بنانے کے لیے وقف کریں گے تاکہ یہ قومی سلامتی، ترقی اور اقتصادی خوشحالی کے اہداف کے حصول میں اہم کردار ادا کر سکے۔یو این ایس کے مطابق انہوں نے “آتم نربھر بھارت” (خود انحصاری) اور دفاعی شعبے میں مقامی پیداوار کے فروغ کو بھی بحریہ کی ترجیحات میں شامل قرار دیا۔ اس موقع پر انہوں نے سبکدوش ہونے والے بحریہ سربراہ ایڈمرل دنیش کمار ترپاٹھی کو خراجِ تحسین پیش کرتے ہوئے انہیں دنیا کے بہترین فوجی پیشہ ور افراد میں شمار کیا۔ایڈمرل کرشنا سوامی ناتھن یکم جولائی 1987 کو بھارتی بحریہ میں شامل ہوئے تھے اور مواصلاتی نظام اور الیکٹرانک جنگی مہارت کے ماہر سمجھے جاتے ہیں۔ وہ نیشنل ڈیفنس اکیڈمی کھڑکواسلا، برطانیہ کے جوائنٹ سروسز کمانڈ اینڈ اسٹاف کالج، کالج آف نیول وارفیئر کرنجا اور امریکی نیول وار کالج نیوپورٹ کے فارغ التحصیل ہیں۔اپنے طویل بحری کیریئر کے دوران انہوں نے متعدد اہم جنگی اور انتظامی عہدوں پر خدمات انجام دی ہیں۔ انہوں نے میزائل بردار جہاز آئی این ایس ودیوت، وِناش، کولش، گائیڈڈ میزائل ڈسٹرائر آئی این ایس میسور اور طیارہ بردار بحری جہاز آئی این ایس وکرما دتیہ کی کمان سنبھالی۔ان کی نمایاں خدمات کے اعتراف میں انہیں پرم وششٹ سیوا میڈل، اتی وششٹ سیوا میڈل اور وششٹ سیوا میڈل سے نوازا جا چکا ہے۔ایڈمرل سوامی ناتھن کے پاس جواہر لعل نہرو یونیورسٹی سے بی ایس سی، کوچین یونیورسٹی آف سائنس اینڈ ٹیکنالوجی سے ٹیلی کمیونیکیشن میں ایم ایس سی، کنگز کالج لندن سے دفاعی مطالعات میں ایم اے، جبکہ ممبئی یونیورسٹی سے اسٹریٹجک اسٹڈیز میں ایم فل اور بین الاقوامی مطالعات میں پی ایچ ڈی کی ڈگریاں موجود ہیں۔
