نائب وزیر اعلیٰ نے ہندواڑہ کا دورہ کیا ، ڈرگمولہ ۔ ہتمولہ پُل پروجیکٹ کا افتتاح کیا

ہندواڑہ//نائب وزیر اعلیٰ مسٹر سریندر چودھری نے ترقیاتی کاموں کا جائیزہ لینے ، عوامی سہولیات کا جائیزہ لینے اور متعدد مقامات پر عوامی رسائی کے پروگرام منعقد کرنے کیلئے آج کپواڑہ ضلع کے ہندواڑہ کا ایک وسیع دورہ کیا ۔ نائب وزیر اعلیٰ کے ہمراہ رُکن اسمبلی چودھری محمد رمضان اور ایم ایل اے اوڑی ڈاکٹر سجاد شفیع بھی موجود تھے ۔ ایک وسیع دورے کے دوران نائب وزیر اعلیٰ نے نالہ اپ پور پر 110 میٹر طویل ڈرگمولہ ۔ ہتمولہ پُل کا بھی افتتاح کیا ۔ اس موقع پر بات کرتے ہوئے انہوں نے کہا کہ طویل انتظار کے بعد پل کا منصوبہ ڈرگمولہ اور ملحقہ علاقوں کے لوگوں کیلئے رابطے ، نقل و حرکت کی آسانی میں نمایاں بہتری لائے گا ۔ انہوں نے کہا ’’ یہ پُل جو ایک طویل عرصے سے زیر التوا تھا ، ضروری خدمات تک رسائی میں اضافہ کرے گا اور مقامی باشندوں کیلئے بہتر مواقع پیدا کرے گا ۔ نائب وزیر اعلیٰ نے ہندواڑہ کے بس اسٹینڈ اور مین بازار کا بھی دورہ کیا اور مقامی ٹرانسپورٹ اور تاجر انجمنوں کے بڑے اجتماعات سے خطاب کیا ۔ اجتماعات سے خطاب کرتے ہوئے نائب وزیر اعلیٰ نے یقین دلایا کہ حکومت ٹرانسپورٹرز اور تاجروں کی فلاح و بہبود کیلئے پرعزم ہے اور یقین دلایا کہ تمام حقیقی مسائل کو ترجیحی بنیادوں پر حل کیا جائے گا ۔ انہوں نے اس بات پر زور دیا کہ موجودہ حکومت نے ہندواڑہ میں طویل عرصے سے زیر التوا ترقیاتی کاموں کو تیز رفتاری کی بنیاد پر مکمل کیا ہے ۔ انہوں نے بتایا کہ مختلف اہم سڑکوں اور پلوں کے پروجیکٹوں پر کام جاری ہے ، ہندواڑہ کیلئے پی ایم جی ایس وائی کے تحت پانچ سڑکوں کو بھی منظوری دی گئی ہے اور ان پروجیکٹوں پر جلد ہی کام شروع ہو جائے گا ۔ ڈرگمولہ پل کا ذکر کرتے ہوئے انہوں نے کہا کہ یہ منصوبہ کافی عرصے سے زیر التوا تھا لیکن موجودہ حکومت نے اسے دو سال کے اندر مکمل کیا ہے ۔ نائب وزیر اعلیٰ نے متعلقہ حکام کو ہدایت دی کہ وہ مزدوروں اور مسافروں کی سہولت کیلئے ہندواڑہ میں لیبر سرائے سہولت کی تعمیر کیلئے موزوں اراضی کی نشاندہی کریں ۔ انہوں نے میکڈمائیزیشن کے کاموں اور دیگر جاری ترقیاتی منصوبوں کا بھی جائیزہ لیا اور افسران کو ہدایت دی کہ وہ تمام کاموں کی بروقت تکمیل کو یقینی بنائیں ۔ دن بھر کے دورے کے دوران نائب وزیر اعلیٰ نے بنگس اور دیگر مقامات پر عوامی رابطہ پروگراموں کا بھی انعقاد کیا ، جہاں انہوں نے عوامی وفود سے بات چیت کی اور کپواڑہ ضلع میں مضبوط ترقی ، عوامی خدمات کو بہتر بنانے اور ذمہ دار حکمرانی کے تئیں حکومت کے عزم کا اعادہ کیا ۔ اجتماع سے خطاب کرتے ہوئے انہوں نے کہا کہ دلکش راجور بنگس بے پناہ قدرتی حسن اور سیاحت کی صلاحیتوں سے مالا مال ہے ۔ انہوں نے کہا کہ حکومت بہتر انفراسٹرکچر ، عوامی خدمات اور پائیدار ترقی کے اقدامات کے ذریعے مقامی آبادی کی فلاح و بہبود اور ترقی کیلئے پرعزم ہے ۔ انہوں نے گورنمنٹ میڈیکل کالج ( جی ایم سی ) ہندواڑہ کا بھی دورہ کیا تا کہ عوام کو فراہم کی جا رہی صحت کی سہولیات کا جائیزہ لیا جا سکے ۔ معائینہ کے دوران نائب وزیر اعلیٰ نے پرنسپل ، ڈاکٹروں اور دیگر عملے کے ارکان کے ساتھ تفصیلی بات چیت کی اور بنیادی ڈھانچے ، طبی آلات اور دیگر ضروری سہولیات کی دستیابی کا جائیزہ لیا ۔ ممبر پارلیمنٹ چوہدری محمد رمضان اور ایم ایل اے ڈاکٹر سجاد شفیع نے بھی پبلک آؤٹ ریچ پروگراموں کے دوران اجتماعات سے خطاب کیا ۔ قبل ازیں نائب وزیر اعلیٰ نے ممبر پارلیمنٹ انجینئر شیخ عبدالرشید اور ایم ایل اے شیخ خورشید کی رہائش گاہ ماور لنگیت کا دورہ کیا اور ان کے والد کے انتقال پر تعزیت کی اور ان کے ساتھ ہمدردی کا اظہار کیا ۔ پی ایم جی ایس وائی ، آر اینڈ بی ، کان کنی ، ڈی آئی سی کیو ، لیبر اینڈ ایمپلائمنٹ کے سینئر افسران اور ضلع انتظامیہ کے افسران بھی نائب وزیر اعلیٰ کے ہمراہ تھے ۔