پی ٹی کیو سی سی میں دستکاری مصنوعات کی لیبلنگ کیلئے جمعہ مختص

سری نگر//محکمہ ہینڈی کرافٹس اینڈ ہینڈ لوم کشمیر نے ایک سہولیتی فلاحی اَقدام کے تحت ہفتہ کے ہر جمعہ کو اَپنے پشمینہ ٹیسٹنگ اینڈ کوالٹی سرٹیفکیشن سینٹر (پی ٹی کیو سی سی) میں کاریگروں اور بُنکرکمیونٹی سے تعلق رکھنے والی مشہور کشمیر دستکاری مصنوعات پر لیبل لگانے کے لئے خصوصی طور پر مختص کیا ہے۔پی ٹی کیو سی سی کرافٹ ڈیولپمنٹ اِنسٹی چیوٹ (سی ڈِی آئی) میں کشمیر پشمینہ، کانی اور سوزنی کڑھائی، ختم بند سیلنگ، اخروٹ لکڑی کی نقش و نگاری اور پیپر ماشی کی 6 عالمی شہرت یافتہ جی آئی رجسٹرڈ دستکاریوں کی برانڈنگ اور کیو آر کوڈِنگ کے لئے وَن سٹاپ سینٹر ہے۔ہینڈی کرافٹس اینڈ ہینڈی لو م ڈیپارٹمنٹ کے ترجمان نے تفصیلات بتاتے ہوئے دستکاروں اور بُنکروں کو مشورہ دیا کہ وہ جمعہ کے دِن پی ٹی کیو سی سی سے رابطہ کریں تاکہ وہ اَپنی مصنوعات کی تصدیق اور کیو آر کوڈڈ مقررہ وقت میں حاصل کرسکیں۔ اُنہوں نے مزید کہا، ’’جمعہ کو خاص طور پر ان کاریگروں اور بُنکروں کی سہولیت کے لئے ریزرو ڈے کے طور پر منتخب کیا گیا ہے جو عام طور پر اِس دِن اَپنی ہفتہ وار چھٹی لیتے ہیں۔‘‘