راجوری//وزیر اعلیٰ عمر عبداللہ نے آج بڈھال گاؤں کا دورہ کر کے ان 17 افراد کے اہل خانہ سے ملاقات کی جنہوں نے المناک طور پر اپنی جانیں گنوائیں جس سے تین خاندان متاثر ہوئے ۔ وزیر اعلیٰ نے گہرے دُکھ کا اظہار کرتے ہوئے تعزیت کا اظہار کیا اور سوگوار خاندانوں کو ان کی حکومت کی طرف سے مکمل تعاون اور مدد کا یقین دلایا ۔ دورے کے دوران ان کے ہمراہ کابینہ کے وزیر جاوید رانا اور ایم ایل اے بدھل جاوید اقبال چوہدری بھی تھے ۔ وزیر اعلیٰ نے اس بات پر زور دیا کہ حکومت کی ترجیح مستقبل میں ایسے واقعات کی روک تھام اور بدقسمت اموات کو فوری طور پر روکنا ہے ۔ انہوں نے عوام کو یقین دلایا کہ سانحہ کی وجوہات کا تعین کرنے کیلئے تفصیلی تحقیقات جاری ہے ۔
انہوں نے کہا ’’ سول انتظامیہ اور محکمہ صحت اس معاملے کو فعال طور پر حل کررہے ہیں جبکہ پولیس نے واقعے کی تحقیقات کیلئے ایک خصوصی تحقیقاتی ٹیم ( ایس آئی ٹی ) تشکیل دی ہے ۔ مزید براں ایک مرکزی ٹیم کو تعینات کیا گیا ہے اور اس بدقسمتی سے جانی نقصان کے پیچھے وجوہات کا پتہ لگانے کیلئے تندہی سے کام کر رہی ہے ۔ ‘‘دورے کے دوران ایم ایل اے بدھل جاوید اقبال چوہدری نے متاثرہ خاندانوں کو معاوضے کی تجویز پیش کی ۔ وزیر اعلیٰ نے تصدیق کی کہ تجویز زیر غور ہے اور بروقت کارروائی کا وعدہ کیا ۔ وزیر اعلیٰ نے ڈپٹی کمشنر راجوری کو ہدایت دی کہ وہ اس مشکل وقت میں اہل خانہ کی ہر طرح کی مدد کریں ۔ انہوں نے عوام کو یقین دلایا کہ تحقیقات کے نتائج کو شفاف بنایا جائے گا اور نتائج کی بنیاد پر مناسب اقدامات کئے جائیں گے ۔ انہوں نے کہا کہ ان المناک اموات کے پیچھے وجوہات کی نشاندہی کرنا ہماری اولین ترجیح ہے اور ہم مستقبل میں ایسے واقعات کو روکنے کیلئے اقدامات اٹھانے کیلئے پرعزم ہیں ۔
