وکست بھارت کے حصول کیلئے ہندوستانی ریلوے کو ترقی دینا ضروری ہے/ وزیر اعظم نریندر مودی
سرینگر// وزیر اعظم نریندر مودی نے سوموار کو نئے جموں ریلوے ڈویژن کا عملی طور پر افتتاح کیااور اسے جموں و کشمیر کے رابطے اور بنیادی ڈھانچے کی ترقی میں ایک تاریخی سنگ میل قرار دیا۔انہوں نے جموں و کشمیر کے لوگوں کو مبارکباد دیتے ہوئے کہا کہ جموں و کشمیر کا قومی ریلوے نیٹ ورک میں انضمام ہندوستانی ریلوے کو کارکردگی، رفتار، اور مسافروں کے تجربے میں عالمی رہنما کی حیثیت سے تبدیل کرنے کی طرف ایک یادگار قدم ہے۔سی این آئی کے مطابق کے مطابق وزیر اعظم نریندر مودی نے ویڈیو کانفرنسنگ کے ذریعے جموں میں نئے ریلوئے ڈویژن کا افتتاح کیا ۔ اس موقعہ پر آن لائن تقریب سے خطاب کرتے ہوئے وزیر اعظم نریندر مودی نے جموں و کشمیر کے لوگوں کو مبارکباد دیتے ہوئے کہا’’جموں و کشمیر کا قومی ریلوے نیٹ ورک میں انضمام ہندوستانی ریلوے کو کارکردگی، رفتار، اور مسافروں کے تجربے میں عالمی رہنما کی حیثیت سے تبدیل کرنے کی طرف ایک یادگار قدم ہے‘‘۔ انہوںنے کہا ’’اْدھم پور،سرینگربارہمولہ ریلوے لنک پروجیکٹ ایک تاریخی کامیابی ہے جو ہندوستان کی انجینئرنگ کی مہارت کو ظاہر کرتی ہے‘‘۔جدید انجینئرنگ کے کارناموں پر روشنی ڈالتے ہوئے انہوں نے کہا’’ہندوستان کا پہلا کیبل اسٹیڈ ریل پل، انجی کھڈ برج، اور دریائے چناب پر بنا ہوا مشہور آرچ پل دنیا کا سب سے اونچا ریلوے پل، وہ کمال ہیں جو عالمی سطح پر لہریں اٹھا رہے ہیں‘‘۔وزیر اعظم نے اس بات پر زور دیا کہ نئے جموں ریلوے ڈویژن سے نہ صرف جموں و کشمیر کے لوگوں کو فائدہ پہنچے گا بلکہ اس کے فوائد ہماچل پردیش، پنجاب اور لداخ تک بھی پہنچیں گے۔وزیر اعظم نے افتتاح کو ’’سب کا ساتھ، سب کا وکاس ‘‘کے ویژن کے تحت ہندوستان کی اجتماعی ترقی کی علامت قرار دیا، جس میں وکست بھارت(ترقی یافتہ ہندوستان) کے خواب میں رنگ بھر رہے ہیں‘‘۔وزیر اعظم نے کہا ’’وکست بھارت کے حصول کیلئے ہندوستانی ریلوے کو ترقی دینا ضروری ہے‘‘۔ انہوں نے مزید کہا کہ پچھلی دہائی میں ریلوے کے بنیادی ڈھانچے کی جدید کاری، کنیکٹیویٹی میں اضافہ، اور مسافروں کے لیے بہتر سہولیات میں تبدیلی کا مشاہدہ کیا گیا ہے۔انہوں نے کہا کہ حکومت نے پچھلے 10 سالوں میں 30,000 کلومیٹر سے زیادہ نئے ریلوے ٹریک بچھائے ہیں، جو کہ صد فیصدی برقی کاری کے قریب ہے،جو کہ 2014 میں صرف 35 فیصد تھی۔ وزیر اعظم مودی نے کہا ’’آج نئے دور کے رابطے کیلئے ایک بڑا دن ہے۔ یہ ظاہر کرتا ہے کہ پوری قوم ایک ساتھ آگے بڑھ رہی ہے۔ ‘‘ وزیر اعظم نے زور دیا کہ ریلوے کے نئے ڈویژں ٹرمینلز اور جدید سٹیشن تجارت، کاروبار اور روزگار کے بے مثال مواقع پیدا کر رہے ہیں۔انہوںنے کہا ’’ ریلوے کی ترقی سے روزگار کے لاکھوں مواقع پیدا ہو رہے ہیں۔ پچھلے 10 سالوں میں، لاکھوں نوجوانوں کو ریلوے میں ملازمت دی گئی ہے، اور گتی شکتی یونیورسٹی جیسے اقدامات سے افرادی قوت کی مہارت میں مزید اضافہ ہو گا۔ ‘‘ انہوں نے مزید کہا کہ وہ وقت دور نہیں جب بلٹ ٹرینیں پورے ملک میں گزریں گی، جو ریلوے کے سفر کو یادگار بنا دے گی۔وزیر اعظم نے ہندوستان کے بڑھتے ہوئے میٹرو نیٹ ورک کی بھی تعریف کی، جو 2005 میں صرف 5 شہروں سے بڑھ کر آج 21 شہروں تک پہنچ گیا ہے، جس میں 1,000 کلومیٹر سے زیادہ آپریشنل ٹریک ہیں۔مقامی ترقی کی اہمیت پر زور دیتے ہوئے وزیر اعظم مودی نے کہا’’میڈ ان انڈیا‘‘ پہل کے تحت، ریلوے اسٹیشنوں کو جدید بنایا جا رہا ہے، اور تیز رفتار ٹرین کوریڈور تیار کیے جا رہے ہیں۔ یہ یقینی بنائے گا کہ ہندوستان کنیکٹیویٹی اور انفراسٹرکچر میں سب سے آگے ہے۔انہوں نے ہندوستانی ریلوے کو ایک ترقی یافتہ اور خود انحصار ہندوستان کی ریڑھ کی ہڈی بنانے کے حکومت کے عزم کا اعادہ کرتے ہوئے کہا’’یہ صرف کنیکٹیویٹی کے بارے میں نہیں ہے بلکہ امنگوں کو پورا کرنے اور لاکھوں لوگوں کے لیے ایک بہتر مستقبل بنانے کے بارے میں بھی ہے‘‘۔
