جموں و کشمیر کے پنشنرز کیلئے بڑی سہولت، جے کے بینک پنشن تقسیم کرنے والے بینکوں میں شامل
سرینگر//یو این ایس // مرکزی وزیر مملکت برائے وزیراعظم دفتر ڈاکٹر جتیندر سنگھ نے کہا ہے کہ گزشتہ بارہ برسوں کے دوران نریندر مودی حکومت کی پالیسیوں کا بنیادی مقصد عوام کو بہتر اور آسان زندگی کی سہولیات فراہم کرنا رہا ہے، جبکہ بزرگ شہریوں اور پنشنرز کی فلاح و بہبود کو خصوصی ترجیح دی گئی ہے۔یو این ایس کے مطابق انہوں نے کہا کہ ملک میں آبادی کے بدلتے ہوئے رجحانات اور پنشنرز کی بڑھتی ہوئی تعداد کے پیش نظر حکومت نے ریٹائرڈ ملازمین کیلئے متعدد اصلاحات اور سہولیات متعارف کرائی ہیں تاکہ انہیں باوقار اور سہل زندگی میسر آ سکے۔ ڈاکٹر جتیندر سنگھ نے کہا کہ ریٹائرمنٹ ملازمت کا اختتام نہیں بلکہ زندگی کے ایک نئے اور مثبت مرحلے کا آغاز ہے، جہاں ملازمین اپنی دہائیوں پر محیط مہارت اور تجربے کو معاشرے اور ملک کی ترقی کیلئے بروئے کار لا سکتے ہیں۔انہوں نے اعلان کیا کہ جموں و کشمیر بینک کو باضابطہ طور پر ان بینکوں کے پینل میں شامل کر لیا گیا ہے جو ریٹائرڈ سرکاری ملازمین کو پنشن کی ادائیگی کے مجاز ہیں۔ اس سلسلے میں محکمہ پنشن و پنشنرز ویلفیئر اور جموں و کشمیر بینک کے درمیان مفاہمتی یادداشت (ایم او یو) پر بھی دستخط کیے گئے ہیں۔ ان کا کہنا تھا کہ چونکہ جموں و کشمیر کے بیشتر سرکاری ملازمین کے تنخواہی اکاؤنٹس جے کے بینک میں ہیں، اس لیے یہ اقدام پنشن اور ریٹائرمنٹ فوائد کی بروقت اور آسان فراہمی میں معاون ثابت ہوگا۔ڈاکٹر جتیندر سنگھ نے کہا کہ جموں و کشمیر کو مرکزی زیر انتظام علاقہ بنائے جانے کے بعد یہاں کے سرکاری ملازمین براہِ راست مرکزی حکومت کے پنشن نظام کا حصہ بن گئے ہیں، جس کے نتیجے میں ان کی فلاح و بہبود اور پنشن سے متعلق معاملات کی ذمہ داری بھی مرکزی حکومت پر عائد ہوتی ہے۔ انہوں نے کہا کہ اسی مقصد کے تحت ملک بھر میں پری ریٹائرمنٹ ورکشاپس کا انعقاد کیا جا رہا ہے تاکہ ملازمین کو ریٹائرمنٹ سے قبل مختلف سہولیات، پنشن فوائد اور بعد از ملازمت مواقع کے بارے میں مکمل آگاہی فراہم کی جا سکے۔مرکزی وزیر نے کہا کہ ایک وقت تھا جب ملک میں سرکاری ملازمین کی تعداد پنشنرز سے زیادہ تھی، لیکن اب صورتحال تبدیل ہو چکی ہے اور پنشنرز کی تعداد مسلسل بڑھ رہی ہے۔ یہی وجہ ہے کہ حکومت نے بزرگ شہریوں کی ضروریات کو مدنظر رکھتے ہوئے پنشن نظام میں جدید اصلاحات متعارف کرائی ہیں۔یو این ایس کے مطابق انہوں نے بتایا کہ حکومت نے پنشن قواعد و ضوابط کو سادہ اور مؤثر بنانے کے ساتھ ساتھ مکمل ڈیجیٹلائزیشن کی جانب اہم پیش رفت کی ہے۔ اب پنشنرز کو لائف سرٹیفکیٹ جمع کرانے کیلئے دفاتر یا بینکوں کے چکر نہیں لگانے پڑتے بلکہ فیس آتھنٹیکیشن ٹیکنالوجی سمیت متعدد ڈیجیٹل ذرائع کے ذریعے گھر بیٹھے یہ عمل مکمل کیا جا سکتا ہے۔ڈاکٹر جتیندر سنگھ کے مطابق نومبر 2025 میں منعقدہ قومی ڈیجیٹل لائف سرٹیفکیٹ مہم کے دوران ملک بھر میں 1.91 کروڑ سے زائد ڈیجیٹل لائف سرٹیفکیٹس جمع کرائے گئے، جن میں سے 1.16 کروڑ سے زیادہ فیس آتھنٹیکیشن ٹیکنالوجی کے ذریعے حاصل کیے گئے۔ انہوں نے کہا کہ یہ اعداد و شمار اس بات کا ثبوت ہیں کہ بزرگ شہری جدید ٹیکنالوجی سے فائدہ اٹھا رہے ہیں اور اس سے ان کی مشکلات میں نمایاں کمی آئی ہے۔انہوں نے ’’بھوشیہ پورٹل‘‘ کا حوالہ دیتے ہوئے کہا کہ اس پلیٹ فارم نے پنشن کے پورے عمل کو ڈیجیٹل بنا دیا ہے، جس کے نتیجے میں پنشن کیسوں کی بروقت تکمیل اور ادائیگی ممکن ہو رہی ہے۔ اس کے علاوہ انٹیگریٹڈ پنشنرز پورٹل کے ذریعے پنشن سلپس، ڈیجیٹل لائف سرٹیفکیٹس، فارم 16، ڈیو اینڈ ڈرون اسٹیٹمنٹس اور دیگر خدمات ایک ہی پلیٹ فارم پر دستیاب ہیں۔مرکزی وزیر نے کہا کہ حکومت پنشنرز کی شکایات کے ازالے کیلئے قومی سطح پر پنشن عدالتیں بھی منعقد کر رہی ہے، جبکہ سی پی این گرامس آن لائن شکایتی نظام اور خصوصی کال سینٹرز کے ذریعے بھی مسائل کے فوری حل کی کوشش کی جا رہی ہے۔انہوں نے ’’انوبھَو‘‘ پلیٹ فارم کا ذکر کرتے ہوئے کہا کہ اس کے ذریعے ریٹائر ہونے والے ملازمین اپنے تجربات، مشاہدات اور تجاویز کو دستاویزی شکل دے سکتے ہیں، جس سے ادارہ جاتی سیکھنے کے عمل کو تقویت ملتی ہے اور آئندہ نسلوں کو رہنمائی حاصل ہوتی ہے۔ڈاکٹر جتیندر سنگھ نے کہا کہ وزیراعظم نریندر مودی کے ’’وکست بھارت 2047‘‘ وڑن کو حقیقت کا روپ دینے کیلئے معاشرے کے ہر طبقے کی شرکت ضروری ہے اور ریٹائرڈ ملازمین اس سفر میں اہم کردار ادا کر سکتے ہیں۔ انہوں نے کہا کہ ریٹائرمنٹ کے بعد افراد کے پاس تجربہ، صلاحیت اور وقت موجود ہوتا ہے جسے قومی تعمیر اور سماجی خدمت کیلئے استعمال کیا جا سکتا ہے۔ورکشاپ کے دوران مختلف بینکوں کی جانب سے معلوماتی نمائش بھی منعقد کی گئی، جس میں ریٹائر ہونے والے ملازمین کو پنشن، سرمایہ کاری، مالیاتی منصوبہ بندی اور دیگر خدمات کے بارے میں معلومات فراہم کی گئیں۔ تقریب میں محکمہ پنشن و پنشنرز ویلفیئر کی سیکریٹری نویدیتا شکلا ورما، جموں و کشمیر بینک کے منیجنگ ڈائریکٹر اور چیف ایگزیکٹو آفیسر امیتاو چٹرجی اور دیگر سینئر افسران بھی موجود تھے۔ڈاکٹر جتیندر سنگھ نے امید ظاہر کی کہ حکومت کی نئی اصلاحات اور ڈیجیٹل سہولیات بزرگ شہریوں کیلئے ایک نئی شروعات ثابت ہوں گی اور وہ اپنی توانائی، تجربے اور صلاحیتوں کو معاشرے اور ملک کی خدمت کیلئے مزید مؤثر انداز میں بروئے کار لا سکیں گے۔
