یہ کشمیر کے دیہی علاقوں اور خطے کی وسیع تر ترقی کے لیے اہم ثابت ہوگا/ ڈاکٹر جتندر سنگھ
سرینگر // جموں ڈویژن میں ملک کے ریلوے میں ایک نئے باب کے افتتاح کو ایک تاریخی سنگ میل کے طور پر سراہتے ہوئے سائنس اور ٹیکنالوجی، ارتھ سائنسز کے مرکزی وزیر مملکت ڈاکٹر جتیندر سنگھ نے کہا کہ یہ کشمیر کے دیہی علاقوں اور خطے کی وسیع تر ترقی کے لیے اہم ثابت ہوگا۔سی این آئی کے مطابق جموں میں تقریب سے خطاب کرتے ہوئے مرکزی وزیر ڈاکٹر جتندر سنگھ نے اس کامیابی کی طرف جانے والے طویل سفر کی عکاسی کی، اور یاد کرتے ہوئے کہ ریلوے اسٹیشن نے پانچ دہائیوں سے زیادہ پہلے 1972 میں پہلی ٹرین کی آمد کا مشاہدہ کیا تھا۔ انہوں نے نوٹ کیا کہ اس سنگ میل اور آج کی کامیابی کے درمیان فرق اہم سوالات کو جنم دیتا ہے۔ انہوںنے سوالیہ انداز می پوچھا ’’کیا یہ انتظامی نااہلی، سیاسی ارادے کی کمی، یا بعض عناصر کی وجہ سے تھا جو ریل رابطے کے ذریعے کشمیر کے بقیہ ہندوستان کے ساتھ انضمام کی مخالفت کر رہے تھے؟‘‘۔ ڈاکٹر سنگھ نے اس ویژن کو حقیقت میں بدلنے کا سہرا وزیر اعظم نریندر مودی کی قیادت کو دیا۔ انہوں نے کہا ’’ شاید یہ تقدیر تھی کہ ہمیں اس لمحے کو دیکھنے کیلئے وزیر اعظم مودی کی قیادت کے آنے تک، 50 سال سے زیادہ انتظار کرنا پڑا۔ یہ ان کی رہنمائی میں تھا کہ یہ خواب، جو کبھی ناممکن سمجھا جاتا تھا، اب پورا ہو گیا ہے۔ ‘‘ ڈاکٹر سنگھ نے پراجیکٹ کے اثرات کے بارے میں امید کا اظہار کرتے ہوئے اس بات پر زور دیا کہ اس سے خطے میں ترقی کے نئے افق کھلیں گے۔ انہوں نے کہا کہ یہ نہ صرف کشمیر کے لیے بلکہ ہندوستانی ریلوے کیلئے ایک تاریخی دن ہے، کیونکہ یہ اس خواب کی تکمیل کی علامت ہے جو بہت پہلے ناممکن نظر آتا تھا۔
